Горнай улууһун дьоно-сэргэтэ кыстыгы этэҥҥэ туораан, күөх дуолга үктэммитин уруйдаан, ийэ тылга, төрүт култуураҕа дириҥ ытыктабылын үбүлүөйдээх ыһыахтарыгар көрдөрдө. 90 сыл илдьэ кэлбит үтүө үгэстэрин кэлэр көлүөнэлэргэ бүөбэйдээн, харыстаан чөл тириэрдэр ыра санааларын сиэрин-туомун толордулар.
Горнай улууһун олохтоох бэйэни салайыныы уорганнара улуус тэрилтэлэрин, нэһилиэнньэни кытта хардарыта бииргэ үлэлэһэн, улуус тэриллибитэ 90 сылын уонна XXI спорт национальнай көрүҥнэригэр «Манчаары оонньуулара» спартакиаданы бэлиэтииллэр. Бэлэмнэнии дьаһаллары ыытан кэллилэр.
«Манчаары спартакиадата кыаҕы, күүһү, дьулууру, сомоҕолоһууну уонна эйэни түстээтин. Горнайбыт инники сайдыытыгар дьолу тосхойдун, алгыстаах буоллун!«, — диэтилэр бэйэлэрин эҕэрдэлэригэр Никита Андреев, Горнай улууһун баһылыга уона Алквиад Тарасов, улуус депутаттарын Сэбиэтин бэрэссэдээтэлэ.
Салайааччылар сайыҥҥы күөх быйаҥтан элбэх оту оттоон, үрүҥ илгэни үрүлүтэн, инникигэ эрэллээх, түмсүүлээх буоларга биир дойдулаахтарыгар эрэнэллэрин биллэрдилэр.
Улуу Тунах ыһыах сахалар сүдү баайбыт, киэн туттуубут буолан, омукпут уратытын бэлиэтиир, улуу олоҥхобутун, оһуохайбытын аар-саарга ааттатар. Үрдүк Айыыларга сүгүрүйэр, айгыр-силик айылҕабытын кытта алтыһар ытык-мааны күммүтүгэр норуоппут өйө-санаата түмүллэр, үс кута бөҕөргүүр, өрөгөй талаана арыллар, суруйда https://www.instagram.com/gornynews/
