13 От ыйа 13.07
  • 28°
  • $ 87,74
  • 95,76

Элгээйигэ 465 гектар ходуһа босхолонуо

12:12, 04 октября 2016
Текст:
Читайте нас на
Яндекс Новости
ЯДВ

2017 сылга Ленин уордьаннаах «Элгээйи» сопхуос төрүттэммитэ 60 сыллаах үбүлүөйүн үөрүүлээхтик бэлиэтээһиҥҥэ билиҥҥэттэн бэлэмнэнии үлэтэ барар.


Хаһан эрэ өрдөөҕүтэ Угут Күөл көлүччэ эрэ саҕа уулаах, сыһыытыгар быһыйдар сырсар, уҥмат тыҥалаах аттар күрэхтэһэр дэхси хонуулаах этэ. Олохтоохтор хаарыаннаах оттонор ходуһаларын ууга былдьатан улаханнык хомойо сылдьыбыттара. Ууну түһэрии «тойоно», бу идэтигэр быйыл 53-с сылын бэриниилээхтик үлэлии сылдьар Исидор Петровка бэрт элбэхтик эппиттэрэ, туруорсубуттара, көрдөспүттэрэ.

Ааспыт нэдиэлэ бээтинсэтигэр олохтоохтор баҕарбыт баҕа санаалара туолан, ууну ыытыыга бэрт дириҥ, уһун ханааба хаһыллан, эбэлэрин күүс өттүнэн баһылыы сытар ууну түһэриигэ үөрүүлээх тэрээһин буолла. Олохтоохтор маныаха эрдэттэн бэлэмнэммиттэрэ харахха быраҕыллар. Тэрээһини В.Н. Семенов дириэктэрдээх Элгээйитээҕи култуура дьиэтин үлэһиттэрэ иилээн-саҕалаан ыыттылар. Олохтоох алгысчыт өбүгэлэрбит сиэрдэрин толору тутуһан, аал уоту күлүбүрэччи уматан, арыылаах алаадьынан айах тутан, ыалдьыттарын күндүлээн, үрдүк айыылартан көрдөһөн бэрт уһуннук эттэ-тыынна. Тыл эппит, эҕэрдэлээбит мелиоратор, СӨ тыатын хаһаайыстыбатын үтүөлээх үлэһитэ И.Н. Петров, Элгээйи нэһилиэгин баһылыгын солбуйааччы О.А. Попов, Арассыыйа Федерациятын Сэбиэтин чилиэнэ А.К. Акимов көмөлөһөөччүтэ А.И. Петров, улуустааҕы тыа хаһаайыстыбатын управлениетын начаалынньыга И.В.Тихонов, Элгээйи нэһилиэгин дьокутаата, бааһынай хаһаайыстыба салайааччыта Б.И. Габышев бу дьыала кэскиллээҕин, нэһилиэк оттонор ходуһата кэҥээн, сүөһүнү, сылгыны иитиигэ усулуобуйа үөскүөҕүн тоһоҕолоон бэлиэтээтилэр, үлэлээбит механизатордарга грамоталары, бэлэхтэри туттартаатылар.

Экскаваторщик Эдуард Монжоев турба иннигэр бүөлүү сытар буору хастараатын кытары күөлтэн дохсун уу ханааба устун сүүрүгүрэн барда. Мелиоратор Исидор Петровтан ыйыталаспыппар маннык кэпсээтэ:
Ууну түһэриигэ Ньурбатааҕы мелиорация управлениетын механизатордара старшай экскаваторщик Н.И. Михайлов, сменщик-экскаваторщик Э.С. Монжоев, бульдозерист Ю.Г. Габышев олус үчүгэйдик үлэлээтилэр. Бу үлэ бырайыага 2009 сыллаахха оҥоһуллубута. Ол кэнниттэн 2011 сылтан 2012 сылга диэри уутун хачайдаан түһэрбиппит. Ол гынан баран, 2013, 2014 сыллар аһара уулаах буолан, күөлбүт уруккутугар түспүтэ. Өрөспүүбүлүкэҕэ улахан туруорсуу түмүгэр 2015 сылтан хоруутун хаһыыны саҕалаабыппыт. Быйыл бастакы түһүмэҕэ буолар. Оттон эһиил 30 тыһ. куб.м ситэри хаһан, балтараа миэтэрэ дириҥнээх ууну ыытан, уопсайа 465гектардаах ходуһаны ууттан босхолуур былааннаахпыт. Быйыл табылыннаҕына, 250 гектар ходуһа ууттан босхолонуо.

Следите за самым важным и интересным в Telegram-канале и WhatsApp-группе ЯСИА