29 Кулун тутар 29.03
  • -14°
  • $ 92,26
  • 99,71

Үөһээ Бүлүүтээҕи "Хотун Бүлүү-Медиа" тэрилтэ киинэ саалатын арыйда

10:02, 11 октября 2016
Текст:
Читайте нас на
Яндекс Новости
ЯДВ

2016 сыл дойду үрдүнэн киинэ сыла биллэриллэн, Бүтүн Россиятааҕы федеральнай киинэ фондата бастыҥ бырайыактарга куонкурус биллэрбитэ. Ббарыта 810 сайаапка киирбититтэн, Саха сириттэн үс бырайыак кыайыылааҕынан тахсан, Амма, Уус Алдан уонна Үөһээ Бүлүү улуустарыгар кинотеатрдар арыллар кыахтаннылар.


Үөһээ Бүлүү улууһуттан «Хотун Бүлүү-Медиа» МАУ граҥҥа 5 мөлүйүөн солкуобайы ылла. Бу үпкэ тэрилтэ аныгы ирдэбилгэ эппиэттиир киинэ көрдөрөр оборудованиены уонна 70 миэстэлээх сымнаҕас олбохтоох кириэһилэлэри ылан, ону тэҥэ улуус салалтатын өйөбүлүнэн урукку киинэ көрдөрөр сааланы өрөмүөннээн, олохтоохтор аан дойду экраныгар тахсар саҥа киинэри көрөр кыахтаннылар.

Күүстээх үлэ түмүктэнэн, алтынньы 7 күнүгэр улууска өтөр-наар буола илик сонун, үөрүүлээх түгэн – аан дойду премьераларын тэҥҥэ көрдөрөр кыахтаах киинэ саалатын арыллыытын үөрүүлээх түгэнэ буолан ааста.

Таисия Симеонова, Үөһээ Бүлүүтээҕи «Хотун Бүлүү-Медиа» автономнай тэрилтэ салайааччыта:

Тыа сиригэр маннык дьоҕус киинэ саалаларын сайыннарыынан дьарыктанар республиканскай киинэ ситимэ аҕыйах сыллааҕыта тэриллэн, алтыс кинотеатрын арыйда. Ол иһигэр, биһиги кинотеатрбыт республикаҕа федеральнай киинэ фондатын өйөбүлүнэн арыллыбыт бастакы кинотеатр буолар.

Биһиги тутуһар сүрүн усулуобуйабыт – көрдөрөр киинэбит 50 %-на Россияҕа оҥоһуллубут буолуохтаах. Билиэт сыаната үөһэттэн быһыллан кэлбитэ, ол быһыытынан сарсыардааҥы сеанска билиэт сыаната 180, киэһээҥи кэмҥэ 230 солкуобайга тэҥнэһэр. Касса киэһэ 10 чааска диэри үлэлиир, билиэттэри интернет нөҥүө онлайн төлөпүөн нөҥүө сакаастыаххытын сөп. Киинэ саалата өрүү толору буоларын туһугар инникитин тыа сирдэриттэн көрөөччүлэр элбииллэрин күүтэбит. Билигин иһитиннэрии-көрдөрүү үлэтигэр биир улахан афиша суоҕа сүрүн мэһэйинэн буолар эрээри, бу боппуруос инникитин быһаарыллыаҕа диэн эрэллээхпин. 

Петр Чиряев, республиканскай киинэ ситимин дириэктэрэ:

Республиканскай киинэ ситимэ бу сылга өссө 5 киинэ саалатын арыйыыны былаанныыр. Оттон тыа сиригэр маннык саалалар баар буолуулара олохтоохтор дьиэ кэргэнинэн, тэрилтэнэн, эбэтэр чугас доҕотторун кытта өссө биир сынньанар сирдэригэр кубулуйан культура сайдыытын биир көрүҥэ буолар.

Следите за самым важным и интересным в Telegram-канале и WhatsApp-группе ЯСИА