17 Тохсунньу 17.01
  • -48°
  • $ 73,82
  • 83,32

Үөһээ Бүлүүтээҕи баһаарынай чаас базата бөҕөргүүр

15:16, 28 января 2016
Текст:

Икки өрүттээх сөбүлэҥҥэ олоҕуран баһаарынай этэрээт Үөһээ Бүлүүтээҕи техникуму кытары ыкса сибээстээхтик үлэлээбитэ хайа-хайаларыгар даҕаны көмөлөөх уонна туһалаах буолла. Ол курдук, баһаарынай сулууспа байыастарын үөрэтэр анал салаа арыллан үлэлээбитэ иккис сылыгар барда. Маныаха устудьуоннары көрдөрөн үөрэтиигэ, байыастар дьарыктаналларыгар аналлаах полигон оҥоһуллан, база сыллата кэҥээн иһэр. Анал үөрэхтээх баһаарынай сулууспа салаатын хамандыыра Федор Данилов дьуһуурустубатын быыһыгар лекция ааҕар, байыас буолуохтаах усутудьуоннары практика уонна теория өттүнэн бэлэмниир.
Сайыҥҥы өттүгэр дьарыктанарга аналлаах үс этээстээх вышка техникум территориятыгар ааспыт сылга тутуллубута. Кыһыҥҥы өттүгэр дьарыктаналларыгар табыгастаах буоллун диэн техникум урукку хочуолунайын дьиэтигэр биир этээстээх штурмовой кирилиэһинэн эрчиллэр полигон оҥоһуллубута. Оттон быйыл теплодымокамера оҥоһуллан үлэҕэ киирдэ. Сонун тутууну ыаллыы Бүлүү куорат баһаарынай чааһын салайааччылара кэлэн көрөн-истэн, сөҕөн-махтайан бардылар. Маннык үрдүк таһымнаах байыастары дьарыктыыр полигон Бүлүү эҥэр улуустарга бүгүҥҥү күҥҥэ суох.
Теплодымокамера иһэ лабиринт курдук тутуулаах. Эрчиллии кэмигэр хараҥа буолар, уот уматыллар, буруо тахсар, тыас-уус эбиллэр. Байыастар тыынар мааскалаах дьиҥ олоххо буолар ыксаллаах быһыыга-майгыга чугаһатан оҥоһуллубут усулуобуйаҕа эрчиллэллэр. Буруонан туолбут дьиэҕэ киирэн дьону быыһыыр инниттэн, бэйэлэрин доруобуйаларыгар охсууну ылбат курдук сөпкө тыынарга үөрэниэхтэрэ. Байыастар бу полигоҥҥа, былаан быһыытынан хас ый ахсын дьарыктанар буолуохтара.

0
0
17 января 17.01
  • -48°
  • $ 73,82
  • 83,32