Дьокуускай — Аллараа Бэстээх маршрутунан паром бастакы техническэй рейса бу нэдиэлэ бүтүүтүгэр барыан сөп. Ол эрээри, былаан муус барыытыттан тутулуктаах, ЯСИА-ҕа «Паромы Якутии» УК салайааччыта Николай Ефимов эттэ. Ону сэргэ массыыналары таһыыга тарыып үрдүүрэ күүтүллэрин, ол эрээри пассажирдарга ити таарыйыа суоҕун иһитиннэрдэ.
«Бэҕэһээ уу таһыма үрдээбитин кэннэ, бүгүн 20 сантиметрга намтааһын көстөр. Ол эрээри, массыына парому күүтэр сирэ уунан тулан тураллар. Инженернэй структураны таҥарга уу түһэн кыратык куурарын кэтэһэбит. Ону тэҥэ Даркылаахха дьиэлэр ууга барыыларыттан уот араарыллыбыта, ол эмиэ үлэни ыарырҕатар. Боруобалыыр рейстэри бу нэдиэлэ бүтүүтүгэр ыытаары былаанныыбыт«, — диэтэ.
Салайааччы муус ааһыытын тэтимэ намтаабытын кэннэ причаллары траллааһын үлэтэ саҕаланыахтааҕын бэлиэтээтэ. Билигин докумуоннарынан үлэ барар.
«Ону тэҥэ билигин Госкомцентантарыыптары бигэргэтиини күүтэбит. Уларытыылар пассажирдары таарыйыахтара суоҕа диэхпин сөп — 350 солк улахан киһи уонна 200 солк оҕо. Массыыналар тустарынан эттэххэ, онно эбиллии баар буолуо, онно Госкомцен бирикээһэ наада», — диэтэ Николай Ефимов.
