Дьокуускайдааҕы медтранс дириэктэрин солбуйааччы Михаил Атнашев Дьокуускайга суһал медицинскэй көмө дьиэтигэр ыытыллыбыт баһаары утары үөрэх кэмигэр дьону дьиэттэн таһаарыы түргэнник ыытыллыбытын бэлиэтээтэ.
Сценарий быһыытынан “умайыы” суһал көмө ыстаансыйатын иккис уонна үһүс этээстэригэр буолбут. Уот чугас турар Дьокуускайдааҕы медтранс гараастарыгар тарҕаныан сөптөөҕө. Сигнализация лоп курдук 13.00 үлэлээбит. Дьиэҕэ баар дьон 3 мүнүүтэ иһигэр таһырдьа таһаарыллыбыта. Итини сэргэ тэҥҥэ суһал көмө массыыналара гараастан тахсыбыттара.
Михаил Атнашев эрчиллии наадатын туһунан бу курдук эттэ: “Кемеровоҕа тахсыбыт иэдээн суһал көмөнү кытта бииргэ үөрэҕи ыытарга төрүөтүнэн буолла. Сыала – үлэһиттэри баһаары умулларар бастакы тэриллэринэн туһанарга үөрэтии, дьону уонна тиэхиньикэни түргэнник таһаарыы”.
