Саха сирин социальнай-экономическай сайдыытын көдьүүстээх боппуруостарын туһунан Россия бырабыыталыстыбатын бэрэссэдээтэлэ Дмитрий Медведев уонна өрөспүүбүлүкэ Аҕа баһылыга Егор Борисов оробуочай көрсүһүүлэригэр от ыйын 6 күнүгэр дьүүллэстилэр.
«Норуоттар икки ардыларынааҕы «Азия оҕолоро» спортивнай Оонньуу регион суолталаах тэрээһинэ буолар. Азиатскай континент оҕолоро бары кытталлар. Чуолаан бу кинилэр биһиги олимпийскай саппааспыт буолаллар. Ити хайысхаҕа барыта этэҥҥэ буолуо. Биһиги билигин «Биир ньыгыл Россия» баартыйа кыттыылаах регион сайдыытын тирээн турар боппуруостарыгар кэпсэттибит. Кыһалҕа элбэх, ол гынан баран ситиһии да баар. Эһигини саҥа установка туруоруллубутунан эҕэрдэлиибин (Орто Бүлүү гаас баайдаах сиргэ гааһы биир кэлимник бэлэмниир установка — СИА). Бу история, улахан инвестиция. Саамай сүрүнэ — олох саҥа хаачыстыбата, тоҕо диэтэххэ гаас дьон дьиэтигэр кэлиэ», — диэн бэлиэтээтэ Дмитрий Медведев. Кини бу иннинэ аҕай видеосибээһинэн установкаҕа старт биэрбитэ.
«Төһө да араас кыһалҕа баарын үрдүнэн, өрөспүүбүлүкэ бэйэтигэр эрэллээх. Биһиги туох баар ылыллыбыт бырагырааманы барытын үлэлэтэбит. Экономикаҕа тириэрдиллибит соруктар толоруллаллар. 2015 сылы кытта тэҥнээн көрдөххө, көрдөрүүлэр үрдүктэр, таһым тутуһуллар. Биһиги элбэх социальнай кыһалҕаны быһаарабыт. Дьиэ тутуута кимиилээхтик барар. Өскөтүн 2010 сыллаахха 300 тыһ.кв.м. киллэрбит буоллахпытына, билигин ити көрдөрүү икки бүк эбилиннэ. Сылын аайы 10-12 оскуоланы киллэрэбит. Холобур, быйыл 13 оскуола саҥа дьиэҕэ саҥа үөрэх дьылын саҕалыа. Маны сэргэ оҕо дьыссаатынан хааччылыытыгар сүрүн болҕомто ууруллар. Икки аҥар сыл иһигэр 3-тэн 7-гэр диэри саастаах оҕолорго уочараты суох оҥордубут. Быйыл суударыстыбаннай-чааһынай бииргэ үлэлээһин чэрчитинэн уонна федеральнай бюджет өйөбүлүнэн 30 саҥа оскуола иннинээҕи саастаах оҕолорго аналлаах тэрилтэ арыллыа», — диэн иһитиннэрдэ Егор Борисов.
Ил Дархан эбии элбэх оҕолоох дьиэ кэргэттэри сир учаастагынан хааччыйыы, инфраструктура тардыллыыта былаан быһыытынан баран иһэрин эттэ.
«Тыйыс климаттаах сиргэ, ол эбэтэр тутуу сезона кылгас кэмигэр ылыллар ситиһиилэр олус суолталаахтар. Дьыссааттарга уочараты суох оҥорбуккут эмиэ үөрдэр, сорук кытаанах этэ. Биһиги хайаан даҕаны оскуола кыһалҕатын быһаарыахпыт. Федеральнай бюджет уонна регион таһымыгар былааннаныллыбыт үп онно сөп түбэһэр. Россия үрдүнэн элбэх оскуоланы тутуохпутун наада, ол иһигэр Саха сиригэр. Биһиги бу бырагырааманы тиһэҕэр тириэрдиэхпит. Тоҕо диэтэххэ, оскуолата, дьыссаата суох инникигэ сайдыы суох. Бииргэ үлэлиэххэ», — диэтэ премьер.
