«МультиДиТек» кинигэни тыыннааҕымсытан оҥорон таһаарар хампаанньа бородууксуйата, «Якутия» технопаарка резиденнэриттэн бастакынан Россия биллэр «Wildberries» интернет-маҕаһыыныгар сакааска таһаарылынна. Бу туһунан СИА иһитиннэрэр.
«Биһиги Wildberries махтанабыт. Кириисис кэмигэр биһиэхэ өйөбүл буолан, кинигэлэрбитин бэйэтин былаһааккатыгар таһаарбытыгар. «Мой бизнес» киинин кытта бары ирдэбили тутуһан хаачыстыба сертификатын оҥорбуппут. Wildberries кытта кэпсэтии ыыппыппыт. Бүгүн бырайыакпыт олоххо киирдэ», — диэтэ хампаанньа дириэктэрэ Таисия Тарабукина.
Хампаанньа муус устар саҥатыгар «Экспортер года» куонкурус регионнааҕы түһүмэҕэр кыайбыта. «Экспортер года в сфере высоких технологий» номинацияҕа лауреат аатын сүкпүтэ.
Технопаарка резиденин бородууксуйата аан дойду таһымыгар тахсыбыта ыраатта.
Wildberries-ка билигин үс кинигэ сакааска таһаарылынна — «Щелкунчик и Мышиный король», «Сказки о животных» уонна «Вкусные истории».
