Баһаатай – эдэр пионердар саамай чугас доҕордоро, үтүө сүбэһиттэрэ, амарах аҕа табаарыстара. Баһаатай оҕолорру мэлдьи үтүөҕэ, кэрэҕэ сирдээччи, көҕүлээччи.
Ити кэмтэн ыла үгүс сыллар ааспыттара. Онтон кэлин Розалия Иудовна үлэтэ бүтүн оройуоҥҥа биллибитэ, дружината уҥа флангаҕа сылдьара. Бу барыта үгүс өрүттээх сыралаах үлэ түмүгэр ситиһиллибитин өйдөөбөт буолуохха сатаммат. Розалия Иудовна “Барабыт Ленин суолунан, Октябрь суолунан” диэн девизтээх Бүтүн Сойуустааҕы марш 10 маршруттарыттан үлэни бары этэрээттэргэ былааннаахтык киллэрэн, айымньылаахтык үлэлээбитэ.
Оччолорго Юрий Гагарин аатынан дружина 5 этэрээтинэн 98 пионеры түмэрэ. 1976-1977 сыллардааҕы үөрэх дьылыгар үөрэҕи билии 100 бырыһыаҥҥа тэҥнэспитэ, 25 оҕо удаарынньыктарынан, 2 оҕо үөрэх туйгуннарынан буолбуттара. Бу этэрээт оройуоҥҥа биэс төгүл правофланговай дружина үрдүк аатын ылбыта.
Аҕа көлүөнэ албан ааттаах суолун үйэтитэр сыалтан этэрээттэринэн матырыйаал хомуйан элбэх альбому оҥорбуттара. Сэрии, үлэ бэтэрээннэрин, үс көлүөнэ көрсүһүүлэрин ыыталлара. Оскуола бочуоттаах ыалдьыттарынан оччотооҕуга сэрии бэтэрээннэрэ Н.Г. Скрябин, И.М. Пестерев, Т.М. Борисов, С.Р. Лазарев, кырдьаҕас хомуньуус, эргиэн туйгуна, педагогическай үлэ бэтэрээнэ М.И. Яковлев, оҥорон таһаарыы маяктара П.Ф. Максимов, В.Д. Барашков уо.д.а. буолаллара.
Доҕордоһуу – оччоттон-баҕаччаҕа диэри улуу күүс. 12 чилиэннээх КИД (клуб интенациональной дружбы) сыл ахсын көхтөөхтүк үлэлиирэ. Биир санааланыы хомуурдарын, атын дойду үөрэнээччилэрин кытары суругунан билсиһиилэри (ол иһигэр саха бастакы дьахтар-лүөччүгэ Вера Захарованы, Ленин соратниктарыгар тиийэ), өҥнөөх хаалтыстар бэстибээллэрин, “нейтроннай буомба суох буоллун!” диэн тиэмэҕэ хомууру тэрээһиннээхтик ыыталлара. “Дьоҥҥо — үөрүүнү” девиһинэн сэрии инбэлииттэригэр, бэтэрээннэргэ, соҕотох ийэлэргэ, утумнаах көмө оҥоһуллара.
Розалия Иудовна үлэтин толору билсиэн баҕалаах дьоҥҥо оскуола пионерскай хоһуттан элбэҕи туһаныахха сөбө. Манна бааллара: ыытыллыбыт үлэлэр рапорт-альбомнара, дневниктэр, үлэ былааннара, методическай анал литэрэтиирэлэр о.д.а. Хос ис киирбэх этэ, хомоҕой оҥоһуулааҕа, тус-туспа тиэмэлэринэн салаалардааҕа. Итилэр бары кини үлэтин кэрэһэлииллэрэ.
Этэрээт баһаатайдарыгар “Товарищ”, октябреноктар баһаатайдарыгар “Березка” кулууптар былааннаахтык үлэлииллэрэ. Пионерскай үлэ оҕону тардар буолуутугар этэрээттэргэ звенолар үлэлэрин тэрийии улахан оруоллааҕа. Бастыҥ звено иһин күрэхтэһиилэр ыытыллаллара, түмүктэрэ таһаарыллан, уопсай көрүүгэ ыйаныллан иһэллэрэ. Звеноводтарга анаан ыйга иккилиитэ сэминээр ыытыллара. Онтон үлэ отчуотун истии, быраактыка көмө тэриллэрэ.
Ити үөһээ этиллибит бары үлэлэр тэрийээччилэриттэн үгүс бириэмэни, дьулууру, айар үлэни эрэйэллэрэ. Розалия Иудовна хаһан да улаханнык айдаара, муҥатыйа сылдьарын көрбөтөхтөрө. Хара сарсыардаттан киэһэ хойукка диэри мэлдьи оскуолаҕа түбүгүрэ сылдьар буолара.
Маны таһынан кини бастыҥ уопсастыбанньык, агитзона солбуллубат начаалынньыга, эдэр учууталлар настаабынньыктара этэ. Киһи быһыытынан сытыары-сымнаҕас майгытынан, уйаҥ дууһатынан, үтүө амарах сүрэҕинэн дьоҥҥо-сэргэҕэ биллэр. Педагогическай кэлэктиип, төрөппүттэр дириҥ ытыктабылларынан күн-бүгүнүгэр диэри туһанар. Кини пионерга ылбыт оҕолоро билигин бэйэлэрэ эһэлэр, эбэлэр.
Дьэ итинник киһи – Кытаанах орто оскуолатыгар 30-тан тахса сыл үрдүкү пионер баһаатайынан үлэлээбит, Саха сирин үөрэҕириитин бочуоттаах бэтэрээнэ, ытыктабыллаах Розалия Иудовна Коркина.
Ааптар: Сэмэн Жендринскэй
