Аллайыаха оройуонун Чокурдах бөһүөлэгэр 2026 сыл балаҕан ыйыгар сууккаҕа 400 кубометр кыамталаах саҥа модульнай канализация-ыраастыыр ыстаансыйаны үлэҕэ киллэрэр былааннаахтар, ол туһунан иһитиннэрэр sakha.gov.ru.
Инникитин итинник бырайыактары өрөспүүбүлүкэ Арктикатын атын оройуоннарыгар эмиэ олоххо киллэрэр былааннаахтар. Хоту сиргэ хомунаалынай инфраструктураны сайыннарыы үлэтэ утумнаахтык ыытыллар уонна уунан хааччыйыы эбийиэктэрин да, ууну таһаарыы систиэмэлэрин да хабар.
Эбийиэк Саха сирин баһылыга Айсен Николаев сорудаҕынан тутуллар уонна Россия президенэ Владимир Путин көҕүлээбит «Олох Инфраструктура» национальнай бырайыагын сыалын-соругун толорор. Ыраастыыр тутуулар оборудованиеларын лизингтиир туһунан сөбүлэһиини 2024 сыллаахха өрөспүүбүлүкэ бырабыыталыстыбатын уонна «Сбербанк»ПАО икки ардыларыгар түһэрсибиттэрэ.
