«Боотур» добровольческай бастакы этэрээт хамандыыра Александр Колесовка «Россия Геройа» аат иҥэрилиннэ. Ол туһунан Ил Дархан Айсен Николаев Өрөспүүбүлүкэ күнүгэр буолбут өрөгөйдөөх тэрээһиҥҥэ эттэ.
Александр Колесовка Российскай Федерация Геройа аат иҥэриллэрин туһунан ыйаахха дойду президенэ Владимир Путин илии баттаата.
«Александр анал байыаннай дьайыы кыттыылааҕа сахалартан бастакынан бу үрдүк наҕарааданы тутта. Ааспыт сыл балаҕан ыйыгар кытаанах киирсиилэргэ Александр бэйэтин дьиҥнээх герой быһыытынан көрдөрдө, эр хоһуун, хорсун быһыы, бэйэни харыстаммакка киирсии холобурунан буолбута. Бэйэтин хорсун быһыытынан төрөөбүт өрөспүүбүлүкэтин уонна дойдубут историятыгар бэйэтин аатын суруйда.
Бүгүн Саха сирин уолаттара элбэх геройдуу быһыыны инники кирбиигэ көрдөрөллөр, хорсуннук киирсэллэр. Өрөспүүбүлүкэ хас биирдиилэринэн киэн туттар! Биһиги хайаан да кыайыахпыт!» — диэтэ Ил Дархан.
Александр Колесов бэлиэтээбитинэн, кини наҕараадата — байыаннай дьаһалга кыттар бары Саха сирин дьонун наҕараадата. «Махтанабын Российскай Федерация президенигэр Владимир Владимирович Путиҥҥа маннык чиэс биэрбитигэр. Россия Геройа — бу олус эппиэтинэстээх уонна бочуоттаах аат. Бу мин эрэ наҕараадам буолбатах, бойобуой доҕотторум наҕараадалара, ким дойдутун көмүскэлигэр туруммут барыбыт киэнэ. Бу тыһыынчанан доброволецтар, мобилизованнайдар, бүгүн инники кирбиигэ нацизмы кытта охсуһар бойобуой бырааттыылар наҕараадалара. Бу наҕараада биһиги өрөспүүбүлүкэбит олохтоохторун уонна салалтатын, байыастарга, кинилэр чугас дьонноругар манна көмөлөһөр дьон наҕараадата», — диэтэ Александр Колесов.
«Боотур-1» хамандыыра Александр Колесов бойобуой соругу толорбутун таһынан, бойобуой доҕотторун өстөөх уотуттан геройдуу быыһаабыт эр хоһуун буолар. Александр Колесов Российскай Федерация Сэбилэниилээх күүстэрин 50 байыаһын, табаарыстарын быыһаабыт, тус бэйэтэ бойобуой техникалары суох оҥорбут, утарылаһааччыга күүстээх оҥорбут оҥорбут буойун буолар.
Кини таанканы утары оборуонаны тэрийбитэ, тэҥинэн бойобуой балаһыанньа хайдаҕын чуолкайдык штабка хааччыйбыта. Утары өрүт сэлиэнньэҕэ баар РФ сэбилэниилээх күүстэрин эргийиигэ бэлэмнэнэрэ биллибитэ. Александр Колесовтан кэмигэр суһал балаһыанньа туһунан чуолкай тыллабыр киирэн, сөптөөх оробуона тэриллэн, эвакуация тэриллибитэ.
«Боотур-1» Саха сириттэн добровольческай этэрээт 2022 сыл от ыйын 27 күнүгэр Ил Дархан сорудаҕынан тэриллибитэ. Анал байыаннай дьаһал кэмигэр Саха сиригэр биэс добровольческай этэрээт баар буолбута. Өрөспүүбүлүкэ байыастары кытта куруук сибээскэ баар, гуманитарнай таһаҕас, эбии экипировканы уонна техниканы тириэрдэр.
