Судаарыстыбаннай наҕараадаҕа байыаннай анал дьаһалга олохторун толук уурбут «Боотур» этэрээт байыастарын киллэрдилэр. Ол туһунан СИА өрөспүүбүлүкэтээҕи суһал штабка сигэнэн суруйда.
«Боотур” этэрээт 90 киһи састааптаах байыаннай анал дьаһал зонатыгар от ыйын бүтүүтэ барбыта. Саха сирин байыастара өстөөҕү утары киирсэр кирбиигэ сылдьан, туруоруллубут соруктары толордулар.
Биир байыас ыарахан эчэйии ылан, госпиталга тыына быһынна. Этэрээт сэттэ байыаһын саамай ыарахан уонна хаан тохтуулаах күөн көрсүүгэ сүтэрбитэ. Ити балаҕан ыйын 24 күнэ. Кинилэр бары, өлбүттэрин кэннэ, судаарыстыбаннай наҕараадаҕа киллэрилиннилэр.
Сэтинньи 2 күнүгэр, бэҕэһээ, Дьокуускайга «Боотур» этэрээт 12 байыаһа кэллэ. Атыттар бөлөхтөрүнэн арахсан, сэтинньи устата төрөөбүт дойдуларын булуохтара. Сорохтор алтынньыга кэлбиттэрэ.
