2016 сылга СӨ Олорор дьиэ-уот коммунальнай хаһаайыстыбата уонна Энергетика министиэристибэтэ Нэһилиэнньэлээх пууннары тупсарыы сылыгар куонкурус ыыппытыгар кыттан, 4,5 мөл. солк. суумалаах субсидияны ылан, нэһилиэк бүддьүөтүттэн эбэн, үлэ ыыталлар. Бу туһунан баһылык Федор Федоров кэпсээтэ.
Ыам ыйыттан саҕалаан электроннай аукционнары ыытан, бэдэрээччиттэр биллибиттэрэ. Ол курдук, «Айан-суол» ХЭТ Майака уулуссатыгар 1741,9 тыһ. солк. суумаҕа буор, гравий кутан, өрөмүөн үлэтин бэс ыйыгар түргэнник бүтэрбитэ. Бу тэрилтэ куруук нэһилиэккэ күүс-көмө буолар.
Уулусса уотун сырдатыыга (Н.А. Самсонов, Тэрэнтэй, Булгунньах уулуссалар) 1253,1 тыһ. солк. суумаҕа «Тыгын» ХЭТ бетон сыбаайалаах баҕаналары туруоран, диоднай лаампалаан, бэйэтэ арахсар-холбонор уоттаннылар.
Бөһүөлэк ортотугар 1591,1 тыһ. солк. суумалаах «Күүкэй чулуу дьоно» диэн ааттаах сквер туруордулар. Эдэр тутааччы Д.С. Саввинов Сунтаарга бастакынан цемент суолга саха оһуорун дьоһуннаахтык ылсан түһэрдэ. Сквер тутуутугар бэйэбит эдэр ыччат үлэлэстэ. Уолаттар салгыы Күндэйэҕэ, Түбэйгэ баран эмиэ сквер тутан, дьон биһирэбилин ыллылар.
Сквергэ нэһилиэк тэрилтэлэрэ, коммунальнай хаһаайыстыба, «Сарыада» култуурунай киин, олохтоох дьаһалта үлэһиттэрэ бары түмсэн, перегной кутуутугар, хатыҥ мас олордуутугар көхтөөхтүк кытыннылар. «Күүкэй» ТХЖПК, чааһынай предпринимателлэр А.А. Фёдоров тыраахтардарын уларсан, М.Е. Алексеев водовоһунан уу кутан, Р.А. Колесов буор таһан, көмө-лөстүлэр. Тырахтарыыстар М.М. Сидоров, В.С. Иванов таһаарыылаахтык үлэлээтилэр.
Быйыл волонтёр оҕолорго хамнас төлөөн, бөһүөлэк иһин-таһын, паарканы ырааһырдарга үлэлэттилэр. Салайааччынан эдэр ыччат лидерэ Ю.С. Прокопьев сырытта.
Күүкэй сынньанар пааркатыгар 500 тыһ. солк. суумалаах оҕо оонньуур тэрилин атыыластылар. Аны «Бонус» ХЭТ тэрилтэ аҕалан туруорарын эрэ кэтэһэллэр. Паарканы саҥардыыга үлэ өссө да барар, олбуор оҥоруутугар, балаҕан тутуутугар матырыйаал атыылапыттар.
Күүкэйдэр 2017 сылга нэһилиэк төрүттэммитэ 185 сылын көрсө өссө да элбэх былааннаахтар.
