Бүлүү куоракка оройуоннааҕы култуура дыбарыаһыгар өрөспүүбүлүкэ, Россия уонна аан дойду таһымыгар ыытыллыбыт күрэхтэргэ улуус аатын аар саарга ааттаппыт, кыайбыт, миэстэлэспит спортсменнарга улуус баһылыга Сергей Винокуров эҕэрдэлээн туран үөрүүлээх быһыыга-майгыга анал бириэмийэлэри туттартаата.
Уопсайа спорка 50 улахан ситиһиилээх спортсмен наҕараадаланна, ол иһигэр 14 улахан киһи уонна 36 оҕо. Маны тэҥэ улууска дьону спорка угуйааччыларга, спорсменнары маннык улахан ситиһиилэргэ тиийэллэригэр бэйэлэрин улахан кылааттарын киллэрэр, күүс-көмө буолар тренердарга эмиэ харчыннан анал бириэмийэлэри туттарда.
Бүлүү улууһуттан спортсменнарбыт Аан дойду таһымыгар ыытыллар күрэхтэригэр бэрт ситиһиилээхтик кытталлар. Ол курдук, Египекка буолбут спортивнай миксфайт спорт көрүҥэр Николай Струкин 1 миэстэ, Вадим Седалищев 1 миэстэ уонна Юрий Алексеев 2 миэстэ буолбуттара. Маны таһынан Дьокуускай куоракка буолан ааспыт, Олимпиийскэй чөмпүйүөн Роман Дмитриев аатынан норуоттар икки ардыларынааҕы көҥүл тустуу күрэҕэр Бүлүү уола Роман Николаев 79 киилэҕэ диэри киирсэн 1 миэстэни ылбыта. Улууска өссө биир спорт маастарынан элбээтэ, Клара Спиридонова быйыл оҕунан ытыыга маастар нуорматын толорон, спорт улахан үрдэлигэр тиийэн анал бириэмийэни ылла, суруйда «Саха» НКИХ.
