19 От ыйа 19.07
  • 21°
  • $ 87,88
  • 96,1

Бүлүүлэр чөл олоҕу, маассабай спорду талаллар

17:01, 03 июня 2021
Текст:
Читайте нас на
Яндекс Новости
ЯДВ

Кэнники сылларга Бүлүү куоратыгар чөл олоҕу тутуһан, доруобуйаларын туругун көрүнэн, кыһыннары-сайыннары сүүрэр-хаамар дьон ахсаана элбээн иһэр, суруйда Николай Федоров, олохсуола.рф


Айылҕа маанылаан үүннэрбит хойуу ойуурдаах сынньалаҥ пааркатыгар сылдьыбыттар араас тренажердарга эрчиллэн, дьарыктанан ааһаллар. Онтон «Оленск» стадиоҥҥа билигин нэдиэлэҕэ үстэ сарсыардааҥҥы зарядкалар ыытыллар буоллулар. Араас саастаах дьон сөбүлээн сылдьар бу зарядкаларын Бүлүүтээҕи спортивнай оскуола тренердэрэ, физкультура учууталлара уочаратынан ыыталлар.

Итини сэргэ Бүлүү к. олохтоохторо Оруктааҕынан, Хомустааҕынан, өрүс боротуохатын кытылынан, «Бүлүү» паарканан ордук сөбүлээн хаамаллар, сүүрэллэр. Хаалыктаах хамыынан дьарыктанааччылар ахсааннара эмиэ элбээн иһэр. Өссө билисипиэтинэн сөбүлээн дьарыктанар кэрэ аҥардары үгүстүк көрүөххэ сөп.
Кыһыҥҥы тымныыттан, сайыҥҥы куйаастан чаҕыйбакка, хас сарсыарда аайы стадиоҥҥа кэлэ турар дьоммут: Маргарита Захарова, Прасковья Егорова, Татьяна Петрова, Тамара Шараборина уо.д.а. хаамыы эти-сиини эрчийэрин, доруобуйаҕа туһалааҕын өрүү бэлиэтииллэр. Итиэннэ саҥа үүммүт күнү үөрэ-көтө уруйдаан, маннык сибиэһэй салгыҥҥа дьүөгэлэри кытта көрсүһэр үөрүүнү, үчүгэй настарыанньаны бэлэхтиир диэн астына кэпсииллэр биһиги бүгүҥҥү кэпсэппит үтүөкээн дьоммут.

Онон чөл олоҕу тутуһуу, спордунан дьарыктаныы, сарсыардааҥҥы зарядка, сүүрүү-хаамыы, киһи доруобуйатын бөҕөргөтөрүн, олоҕу уһатарын дьоммут-сэргэбит өйдүүллэр уонна атыттарга эмиэ холобур буолаллар.

Следите за самым важным и интересным в Telegram-канале и WhatsApp-группе ЯСИА