15 От ыйа 15.07
  • 26°
  • $ 87,74
  • 95,76

Бүлүүгэ тулаайах оҕолорго анаммыт дьиэ үлэҕэ киллэрилиннэ

11:57, 20 января 2016
Текст:
Читайте нас на
Яндекс Новости
ЯДВ
Үчүгэй көстүүлээх, киэҥ-куоҥ подъезтардаах, толору хааччыллыылаах: ванналаах, туалеттаах биирдии-иккилии хостоох квартиралардаах үс мэндиэмэннээх дьиэ «Тулаайах оҕолору олорор дьиэнэн хааччыйыы» федеральнай программанан тутулунна. Сакаасчыт – улуус дьаһалтата, тутааччы — «Промстроймонтаж» ХЭО.
Тутааччылар дьиэни саҥа ньыманан — панеллартан таҥан тутууну ааспыт сайыҥҥыттан саҕалаабыттар. Тэрилтэ бу үс мэндиэмэннээх дьиэтэ улууска үһүс улахан тутуутунан буолар. Аҕыйах сыллааҕыта эмиэ тулаайах оҕолорго анаммыт икки мэндиэмэннээх дьиэни туппута, кэлин итэҕэстэрин туораппыт уопуттаах.
Дьиэ иһигэр сиэри-туому, арчылааһыны толоруу, аал уоту уматыы кэннэ бу улахан үөрүүлээх күн эмиэ элбэх эҕэрдэ, махтал тыллара этилиннилэр. Улуус дьаһалтатын баһылыга С.Н.Винокуров билиҥҥи кэмҥэ босхо дьиэ сэрии ветераннарыгар уонна тулаайах оҕолорго эрэ көрүллэрин бэлиэтээн туран, үөрүүлээх быһыыга-майгыга квартиралар күлүүстэрин оҕолорго туттартаата.
Бу дьоро күн 20 тулаайах оҕо биирдии хостоох квартиралар күлүүстэрин тутан үөрүүлэрэ туохха да тэҥнэммэт буолбутун туһунан этиннилэр. Кинилэр аал уоттарын оттор, унаар буруоларын таһаарар алаһа дьиэлэнэн-уоттанан инники олохторугар эрэллээх буоллулар.
Улахан үөрүүлээх түгэҥҥэ быһаччы сыһыаннаах эппиэкэ уонна попечительство отделын салайаачы Пелагея Антонова үс мэндиэмэннээх дьиэни тутууга сүбэлэһии былырыын түһэрсиллибитин, тутуута түмүктэнэн эрэр сэргэстэһэ турар дьиэҕэ 8 квартира эмиэ тулаайах оҕолорго ананыаҕын, быйыл элбэх квартиралаах таас дьиэ тутуутугар сүбэлэһии түһэрсиллибитин, эһиил үлэҕэ киириэхтээҕин билиһиннэрдэ.
Ити курдук, Дружба переулогар федеральнай программанан саҥа микро-оройуон баар буолуута улууска тулаайах оҕолору олорор дьиэнэн хааччыйыыга үлэ тиһигин быспакка бара турарын туоһулуур.
Николай КУПРИЯНОВ
Следите за самым важным и интересным в Telegram-канале и WhatsApp-группе ЯСИА