Бүгүҥҥүттэн Белградка тустууга аан дойду Кубога саҕаланар. Саха сириттэн биэс спортсмен кыттар — Владислав Андреев, Эдуард Григорьев, Николай Охлопков, Ньургун Скрябин уонна Айаал Лазарев. Сэрэбиэй түмүгүнэн тустууктар утарсааччылара билиннилэр.
Бастакы эргииргэ 57 киилэҕэ диэри ыйааһыннаахтарга Белоруссияттан киирсэр Ньурба бөҕөһө Владислав Андреев Мароккоттан Шакир Ансарины кытары киирсиэ. Кинини хотор түгэнигэр аан дойду икки төгүллээх чөмпүйүөнэ Заур Угуевтыын көрсүө. Бу ыйааһыҥҥа күрэхтэһии бүгүн, ахсынньы 16 күнүгэр Саха сирин бириэмэтинэн киэһээ 19 ч саҕаланыа.
61 киилэҕэ диэри ыйааһыҥҥа Польша сүүмэрдэммит хамаандатыттан Чурапчы бөҕөһө Эдуард Григорьев финал 1/8-гар Армения бөҕөһүн Рамзик Папикянныын күөн көрсүө. Кыайар түгэнигэр салгыы Европа, Арассыыйа 23 саастаахтарыгар диэри чөмпүйүөнэ Абасгаджи Магомедовтыын киирсиэ. Бу ыйааһыҥҥа күрэхтэһии сарсын, ахсынньы 17 күнүгэр Саха сирин бириэмэтинэн киэһэ 19 ч саҕаланыа.
65 киилэҕэ Мэҥэ-Хаҥалас тустууга Ньургун Скрябин Польшаттан Кшиштоф Бьенековскилыын киирсиэ. Салгыы күрэхтэһии саха тустуугун туһатыгар түмүктэннэҕинэ, Дагестантан Исмаил Мусукаевтыын тустууну көрүөхпүт. Маны таһынан, бу ыйааһыҥҥа Сунтаар бөҕөһө Николай Охлопков тустуо. Кини Перу бөҕөһүн Сиксто Аукапиньюны кытары киирсиэ. Кинилэр сарсын тустуохтара.
125 киилэҕэ диэри ыйааһыннаахтарга Айаал Лазарев канадец Амару Дхесины кытары көрсүө. Амару Дхеси Варшаватааҕы Циолковскай Мемориалын кыайыылааҕа, Олимпийскай оонньууларга Панамериканскай сүүмэрдиир турнир финалиһа.
