«Дохсуҥҥа» кыайыылаахтар быһаарыллаары турар долгутуулаах чаастара. Бүгүн манна кыһыл көмүс мэтээл иһин Саха сирин хамаандатыттан Ян Алексеев (48 кг диэри ыйааһыннаахтарга), Денис Нехаев (50 кг диэри), Петр Егоров (52 кг диэри), Назар Андреев (60 кг диэри), Мичилина Сантаева (50 кг диэри) уонна Күннэй Татаринова (54 кг диэри) киирсэллэр.
Полуфиналга Ньурба спортсмена Ян Алексеев бэйэтин ыйааһыныгар эрэллээхтик кыайбыта. Кини техничнэй истиилигэр кореец Ли Сумин сабырыйтаран кыайан утарыласпатаҕа даҕаны. Петр Егоров Кыргызстан боксерун Санжой Сейдекматовы кытта киирсэн эмиэ кыайыыны ылбыта.80 киилэ ыйааһыннаахтартан үөһээлэргэ кореец Джи-Хон Ли уонна СФУо бэрэстэбиитэлэ Кирилл Басалаев киирсиилэрэ түргэн буолбута. Киирсиигэ Сибиир уола күүстээх охсууларынан кореецка эппиэттэтэр да түгэн биэрбэтэҕэ. Онон тренер Джи-Хон Ли кыайтарбытын көрдөрөн, сотторун рингэҕэ бырахпыта.
Финалга көрсүһүүлэр бүгүн «Дохсун» СК 12 чаастан саҕаланнылар.
