Амма улууһугар тигээйинэн дьарыктаныы тэнийэр. Соторутааҕыта Дьокуускайдааҕы тыа хаһаайыстыбатын техникумун прикладной квалификация киинин алта курсаана эксээмэн туттарда уонна үһүс разрядтаах тигээйи көрөөччү буолла. Бу туһунан СИА-ҕа үөрэх тэрилтэтин пресс-сулууспата иһитиннэрэр.
Прикладной квалификация киинин куурустарыгар Амма улууһуттан тыа сиригэр наадалаах идэлэргэ үөрэнэллэр – сылгыһыт, асчыт, сүөһү көрөөччү уо.д.а. Тигээйинэн дьарыктаныыга үөрэтиини быйыл саҕалаатылар. Икки ыйдааҕы үөрэх түмүгүнэн кинилэр «3 рязрядтаах тигээйи иитээччи» буоллулар.
Сэтинньигэ 6 киһи үөрэҕи бүтэрдэ: биэс киһи бюджекка, биир — төлөбүрдээххэ. Курсааннар теорияны эрэ буолбакка, алтынньыга пасекаларга практикаланнылар. Үгүс теория ыраахтан олорон ZOOM былаһаакканан ыытыллыбыт буоллаҕына, эксээмэннэри үөрэх тэрилтэтигэр кэлэн туттардылар.
Эксээмэннэр кэнниттэн курсааннар маннык үөрэнии олус туһалааҕын бэлиэтээтилэр. Элбэҕи билбиттэр, сатабылга үөрэммиттэр. Практикаларын ыыппыт преподавателлэригэр Марат Заляловка уонна үөрэхтэрин кыһаларыгар махтаннылар.
Бэлиэтээн эттэххэ, Амма улууһун сэттэ нэһилиэгэр күһүн 14 тигээйинэн дьарыктанар киһи баара. Билигин кинилэр кэккэлэрэ өссө кэҥиэ.
