7 Алтынньы 07.10
  • -4°
  • $ 60,25
  • 58,24

Амма улууһугар Снежана Назарова социальнай хантыраагынан кэрэ буолуу салонун үлэлэтэр

Снежана Назарова олоҥхо дойдута Сунтаартан төрүттээх, уран тарбахтаах Алтан кийиитэ буолар. Бэйэтэ акушер идэлээх, өр кэм балыыһаҕа үлэлээбит. Оҕо эрдэҕиттэн кэрэҕэ тардыһар кыысчаан, сүрэҕэр иитиэхтээн сылдьыбыт баҕа санаатын толорон, бэйэ дьыалатын тэринэргэ быһаарынар.  Олоҕун суолун атын хайысханан эргитэн кэрэ эйгэтин талар. Идэтинэн үлэтин ааспыт сыл тохтотор.

Снежана Назарова баҕа санаата туоларыгар төһүү күүс буолбут судаарыстыба көмөтүгэр — социальнай хантыраакка махтала муҥура суох.

Ааспыт 2021 сыл ыам ыйын 4 күнүгэр Амма улууhугар нэһилиэккэ «Ньургуһун» диэн дьону кыраһыабай оҥорорго үлэлэһэр салон арыллыбыта.

Салон хаһаайката Снежана Назарова кулун тутар 31 күнүгэр улуус киинигэр киирэн социальнай хантыраак хамыыһыйатыгар бу бырайыагын көмүскээн, докумуоҥҥа илии баттаспыта. Муус устар 20 күнүгэр харчыта түһэн, Дьокуускайтан, суол сабылларын баттаһа, салонун малын барытын атыылаһан, тиэйэн аҕалан, сыа-сым курдук тутан, номнуо үлэлииргэ бэлэм оҥорбута. Бэйэ дьыалатын тэринэргэ кэргэнэ Пётр Михайлович көх-нэм буолан, олбуордарыгар баар кыра дьиэлэрин оҥостон, бэртээхэй салону арыннылар.

Снежана Ивановна сатаабата диэн бука суоҕа буолуо. Кини уран тарбахтаах иистэнньэҥин таһынан иллэҥ кэмигэр сөбүлүүр биир дьарыгынан минньигэс тортары астааһын буолар. Кини оҥорбут тортарын амсайбатах киһи арааһа нэһилиэкпитигэр аҕыйаҕа буолуо. Маны сэргэ, бэртээхэй гамактары өрөр, остуол светильниктэрин, торшердары, киэргэллэри, ытарҕалары, броштары ис дууһатын ууран туран оҥорор. Ылыста да барытын тиһэҕэр тириэрдэр булгуруйбат санаалаах.

Үс оҕолоох дьиэ-кэргэн иһирэх ийэтэ оҕолорун, кэргэнин эмиэ бу кэрэ эйгэҕэ сыһыаран, бары биир киһи курдук тэҥҥэ сылдьаллар, үлэлииллэр.

Салон бэрт тупсаҕайдык оҥоһуллубутун биһирии көрөбүт. Судаарыстыба өҥөтө анаммыт сыалынан-соругунан сөпкө туһаныллыбытын хайҕыыбыт. Миэбэллэрэ барыта үрүҥ уонна хара өҥүнэн дьүөрэлээн ылыллыбыттара бэрт сэргэхтик көстөр. Клиеннэргэ анаан тирии хахтаах кыра дьыбаан, чэй, кофе иһэргэ аналлаах үрүҥ остуол, олоппостор киһи хараҕар тута быраҕыллаллар.

Билиҥҥи хамсык кэмигэр саамай наадалаах салгын ырааһырдар рециркулятор, тэриллэри ултрафиолетовай сардаҥаларынан кичэллээхтик ыраастыыр, дезинфекциялыыр стерилизатор ылыллыбыттара Снежана Ивановна медик идэлээҕин туоһулуур.

«Салон аатыгар тохтуур эбит буоллахха, «Ньургуһун» диэн аат мээнэҕэ буолбатах. Эдьиийим Ньургуйаана Ивановна Ермолаева аатын санатар уонна аҕам айбыт ырыатын аата. Эдьиийим барахсан Амма кэрэ сиригэр ыҥыран, көрдөрөн, Алтаны ис сүрэхпиттэн таптаан, иккис дойду оҥостон олорорбор махталым киниэхэ муҥура суох. Бу сибэкки тоҥтон иҥнибэккэ саас аайы сир кырсын тобулан үрүҥ күҥҥэ талаһарын сэргии көрөбүн«, — диэн сэһэргиир салон хаһаайката Снежана Назарова.

Күн бүгүн салон элбэх килийиэннэри түмэн, бэрт ситиһиилээхтик үлэлии олорор. Эбии хайысхалар кыралаан киирэннэр, нэһилиэк кэрэ аҥаардарыгар бэртээхэй өҥөлөр оҥоһуллаллар, диэн СИА-ҕа суруйдулар Татьяна Атласова, «Алтан нэһилиэгэ» муниципальнай тэриллии дьаһалтата, Владимир Колосов «Центр «Мой Бизнес» Амматааҕы салаатын сэбиэдиссэйэ.

Следите за самым важным и интересным в Telegram-канале и WhatsApp-группе ЯСИА
0
0