21 Тохсунньу 21.01
  • -48°
  • $ 73,82
  • 83,32

Аллараа Бэстээххэ саҥа дьиэҕэ күлүүс туттулар

09:46, 25 мая 2016
Текст:

Аллараа Бэстээххэ Дорожников уулуссатын 10/1 №-дээх үс этээстээх 15 квартиралаах саҥа таас дьиэҕэ ыам ыйын 23 күнүгэр үөрүүлээх быһыыга-майгыга хаһаайыттарга кыбартыыраларын күлүүстэрин туттардылар. Бу уопсай дьиэ РФ «Хаарбах уонна саахалланар туруктаах дьиэттэн дьону көһөрүү» тус сыаллаах бырагыраама чэрчитинэн тутулунна. 


Дьиэни Руслан Трофимов салайар «Стройкомплектсервис» ХЭУо тутан үлэҕэ киллэрдэ. Бу тэрилтэ тутуу салаатыгар үлэлээбитэ уонча сыл буолла. «Сахам сирэ ‒ XXI үйэҕэ» республикатааҕы хамсааһын чэрчитинэн кэккэ объектары, ол иһигэр Төҥүлүгэ, Лоомтукаҕа култуура кииннэрин, Чүүйэҕэ элбэх хайысхалаах киини, Сыымахха оҕо саадын туппута. Олорор дьиэлэри тутууга ‒ бу бастакы таас уопсай дьиэлэрэ.
Улуус баһылыга Николай Старостин, Аллараа Бэстээх баһылыга Георгий Бор саҥа дьиэҕэ көһөөччүлэри истиҥник эҕэрдэлээтилэр итиэннэ тутааччыларга махтаннылар.

«Хаарбах дьиэлэртэн дьону көһөрүү федеральнай бырыгырааманан уонча сыл устата улахан кээмэйдээх үлэ ыытыллар, Россия уонна республикабыт бырабыыталыстыбалара сыллата үп көрөн киин сирдэргэ, куораттарга эрэ буолбакка, тыа сирдэригэр эмиэ тупсаҕай оҥоһуулаах, толору хааччыллыылаах дьиэлэр тутуллаллар. Биһиги улууспутугар бу бырагырааманан кэккэ нэһилиэктэргэ элбэх квартиралаах дьиэлэр дьэндэһэннэр, сүүһүнэн ыаллар саҥа дьиэлэннилэр-уоттаннылар. Аллараа Бэстээххэ эһиил өссө 19 ыал көһөрө былааҥҥа көрүллэр», ‒ диэтэ баһылык Николай Прокопьевич.

11 ыал 1974 сыллаахха тутуллубут Дорожников уулусса 20 №-гэр турар, бэйэлэрэ ааттыылларынан «бараакка», оттон 4 ыал Дорожников уулусса 12 №-гэр эмиэ 1974 сыллаахха тутуллбут 4 квартиралаах дьиэлэргэ олобуттара. Билигин толору хааччыллыылаах, кыһыннары-сайыннары итии, тымныы уунан хааччыйар бойлердаах, киэҥ-куоҥ балконнардаах биир, икки, үс хостоох кыбартыыраларга көһөн киирээччилэр бары да олус үөрбүттэр, сорохтор долгуйууларыттан харахтарыттан уу-хаар бастылар. Уһун кэмҥэ эргэ, тымныы, сииктээх, сорохторугар уу өтөн киирэр дьиэлэригэр олорон үгүс кыһалҕаны көрсүбүт дьон, кырдьыга да, уйадыйыахтарын уйадыйаллар.

Хочоттон төрүттээх Аллараа Бэстээххэ олохсуйбута 23-с сылыгар барбыт Василий Ильич Керемясов саҥа дьиэҕэ биир хостоох кыбартыыра күлүүһүн тутан үөрүүтэ муҥура суох. Кини билигин биэнсийэҕэ олорор, урут сельпоҕа, Энергосбыт, РЭС тэрилтэлэригэр үлэлээбит. Эмиэ бөһүөлэккэ олорбута 23-с сыла буолбут Магадан Багаутдинов икки хостоох кыбартыыра хаһаайына буолбутуттан олус астынарын үөрэ-көтө кэпсиир. «Бу иннинэ олорор дьиэбитигэр муостатын анна бүтүннүү уу буолар этэ, онон билигин сылаас, сырдык дьиэҕэ көспүппүттэн олус үөрэбин«, — диир кини.
Саҥа дьиэҕэ көһөн киирэр Наталья Бегулецкая улуус уонна бөһүөлэк дьаһалталарыгар, тутааччыларга истиҥник махтанна уонна саҥа дьиэҕэ бары эйэ дэмнээхтик, иллээхтик, ыраастык туттан олоруохпут диэн эрэннэрдэ.

0
0
21 января 21.01
  • -48°
  • $ 73,82
  • 83,32