16 От ыйа 16.07
  • 28°
  • $ 87,81
  • 95,78

«Алаас симэҕэ» ансаамбыл ырыаларын диискэтэ күн сирин көрдө

15:40, 19 января 2016
Текст:
Читайте нас на
Яндекс Новости
ЯДВ

1991 сыллаахха тэриллибит ансаамбыл үлэтин-хамнаһын саҥа үрдэлгэ таһаарар сыалтан, 2010 сылтан Светлана уонна Егор Неустровтар салайар «Тулуйхан» студияларын кытта үлэлэһэр. Бу 5 сыллаах үлэ түмүгүнэн, ансаамбыл «Үтүөкэн дойдубут — Хоробут» диэн бастакы альбомун бэлэмнээн биир дойдулаахтарыгар бэлэхтээтэ. Хомуурунньук тахсыыта икки бүк үөрүүлээх буолла. Ол курдук, саҥа альбомҥа олохтоох ырыа, хоһоон айааччылар айымньылара тиһиллэн киирэн оҕолор ыраас, кэрэ куоластарыгар чугдааран ырыа буолан көй салгыҥҥа көттө.

Хоро орто оскуолатын «Алаас симэҕэ» вокальнай ансаамбыл салайааччыта Наталья Алексеева айар үлэтин туһунан маннык кэпсиир:

— Светлана уонна Егор Неустроевтары кытта бииргэ үлэлиэхпититтэн оҕолор сценаҕа тутта-хапта сылдьыылара, куоластара лаппа сайынна. Быйыл лааҕырбытыгар ырыаларбытын компакт-диискэҕэ үйэтитэр сыаллаах үлэлээтибит. Онон бу диискэҕэ, үөрүҥ-көтүҥ, сэргээҥ, — Үөһээ Бүлүүбүт олохтоох автордарын 21 ырыалара киирдэ. Онон бэйэбит автордарбыт тылларыгар уонна матыыптарыгар ырыа хомуурунньуктанныбыт. Махтаныам этэ Андрей Алексеевич Дягилевка, кини элбэх ырыатын ыллыыбыт, бу диискэҕэ кини икки ырыата киирдэ. Туһунан махтаныам этэ Софрон Романович Хобусаровка, Федор Константинович Максимовка, баһылыкпытыгар Семен Николаевич Чиряевка, уонна биһиги үлэбитин сыаналыыр, өйүүр-өйдүүр төрөппүттэрбэр туһунан махтал.

Салгыы диискэ күн сирин көрөрүгэр быһаччы үтүөлээх Хоро нэһилиэгин олохтооҕо, Суруйааччылар сойуустарын чилиэнэ Николай Струкин — Дьулусхан кэпсиир:

— Мелодистар үс хоһооммор ырыа айан дьон истиитигэр таһаарбыттарыгар долгуйан туран махтанабын. Ааспыт сыл бүтүүтэ «Олох барахсан…» диэн ырыаларым хомуурунньуга бэчээттэнэн тахсыбыта. Онтон олуһун өрө көтөҕүлүннүм. 2016 сыл айымньылаахтык саҕаланна. Суруйар-айар санаа өссө күүһүрдэ. Хоро дьоно-сэргэтэ, оҕо аймаҕа олус талааннааҕын бу дьоро киэһэҕэ бигэргэтэн, үөрүүбүт үрдээтэ».

Салгыы Виктор Иванов-Төрөнөйү кытта кэпсэтэбит.

Мин айар үлэм 1990 сылтан саҕаламмыта. Бастакы ырыам Альберт Афанасьев «Сулус» хоһоонугар айыллыбыта. Онтон Ньургун Николаев хоһоонугар «Сэгэрим» ырыа төрөөбүтэ. Былырыын күһүн хомуурунньуктарбын Наталья Алексееваҕа уонна Вилена Ларионоваҕа бэлэхтээбитим, баҕар, оҕолорго туһаныахтара дуу диэн. Оттон ыкса күһүн үс ырыаны саҥалыы тыыннаан оҥордубут диэн биллэрбиттэрэ. Бу диискэҕэ киирбит 3 ырыам оҕо саадын иитиллээччилэригэр анаммыт ырыалар. «Сибэккилэр» ырыабын Зарина Алексеева, «Чаҕылҕан, күлүмнээ» ырыабын Степан Дадаскинов тылларыгар Милан Яковлев ис турукка киирэн туран ыллаатылар. Федора Белолюбская тылларыгар «Көмүс күһүн» ырыабын Роза Хантарова ыллаан дьиэрэттэ. Ырыаларым кыралаан дьон дьүүлүгэр тахсан эрэллэриттэн олус үөрдүм. Онон салгыы айар-тутар санаа, күүс киирэн кэллэ.

«Оҕолорбут олус да сайдыбыттар, бары сир симэҕин курдуктар. Наһаа истиҥ, оҕолуу ыраас кэнсиэртэн саҥа төрөөбүттүү сананан таҕыстыбыт. Наталья Алексееваҕа, Светлана уонна Егор Неустроевтарга сыралаах үлэлэрин иһин махтанабын»,диэн улуустааҕы бырабылыанньа уопсай үөрэхтээһин салаатын салайааччыта Елена Егорова үөрүүтүн тиэрдэр.

«Үтүөкэн дойдубут — Хоробут» диискэҕэ киирбит чахчы даҕаны, оҕо ыллыырыгар сөптөөх, оскуолаҕа, төрөөбүт дойдуга, ийэҕэ тапталы туойар уонна айылҕа кэрэтин кэрэхсиир ис хоһоонноох сүүрбэ биир ырыа көрөөччүлэри-истээччилэри оҕо саас дойдутугар көтүтэн илдьэр ураты айылгылаах, симэлийбэт күүстээх…

Валентина Догоюсова

Следите за самым важным и интересным в Telegram-канале и WhatsApp-группе ЯСИА