Саха Өрөспүүбүлүкэтин Ил Дархана Айсен Николаев биллиилээх саха спортсмена, боксаҕа Европа икки төгүллээх, аан дойду чөмпүйэнээтин үрүҥ көмүс уонна Арассыыйа биэс төгүллээх чөмпүйүөнэ Василий Егорову кытта көрүстэ.
Көрсүһүү кэмигэр кинилэр спорт сайдыытын уонна холбоһуктаах бырайыактарга бииргэ үлэлэһиини кэҥэтии туһунан кэпсэттилэр.
Дьүүллэһиигэ төрөөбүт тылы сайыннарыыга, дьоҥҥо-сэргэҕэ чөл олоҕу тарҕатыыга, ону тэҥэ, олимпийскай уонна профессиональнай таһымҥа Саха сиригэр бокса сайдыытыгар туһуламмыт бырайыактары ырыттылар.
Айсен Николаев этиилэри өйөөтө уонна салгыы олоххо киллэриигэ көмөлөһөргө бэлэмин биллэрдэ. Көрсүһүү түмүгүнэн, кэпсэтиигэ турбут хайысхаларынан бииргэ үлэлэһиини салгыырга уонна күүстэри түмэргэ быһаарыстылар.
«Биһиги спорду сайыннарыыга, чөл олоҕу бөҕөргөтүүгэ уонна төрөөбүт тылы харыстааһыҥҥа туһуламмыт бырайыактары салгыы өйүөхпүт. Василий Егорову кытта бииргэ үлэлээһин өрөспүүбүлүкэ олохтоохторугар наадалаах саҥа көҕүлээһиннэри олоххо киллэрэр кыаҕы биэрэригэр эрэнэбин», — диэн Айсен Николаев бэлиэтээн эттэ.
