Саха сирэ бастыҥ позицияларын тутуһар. Регион алмааһы хостооһуҥҥа Россияҕа эрэ буолбакка, аан дойдуга бастакы миэстэни ылар. Өрөспүүбүлүкэ аан бастаан үрүҥ көмүһү хостооһуҥҥа бастыҥ позицияҕа таҕыста. Бу туһунан муус устар 27 күнүгэр быһа линияҕа регион баһылыга Айсен Николаев иһитиннэрдэ.
«Арҕааҥҥылар санкциялара баалларын иһин, экономикаҕа судургута суох быһыы-майгы баарын үрдүнэн, Саха сирэ Уһук Илиҥҥэ, дойдуга бэйэтин тутаах позициятын тутуһар. Алмааһы хостооһуҥҥа Россияҕа эрэ буолбакка, аан дойдуга эмиэ эрэллээхтик бастакы миэстэни ылабыт, аан бастаан үрүҥ көмүһү хостооһуҥҥа бастакы миэстэҕэ таҕыстыбыт.
Ону тэҥэ чоҕу хостооһуҥҥа, көмүһү хостооһуҥҥа иккис миэстэҕэ сылдьабыт. Неби уонна гаһы хостооһуҥҥа бэһис миэстэни ылабыт. Ити, биллэн турар, биһиэхэ төһө да уустуктар баалларын иһин, социальнай эбээһинэстэрбитин барытын кэриэтэ толорорго кыах биэрэр», — диэн Айсен Николаев бэлиэтээтэ. Итини сэргэ өрөспүүбүлүкэ баһылыга 2025 сыл түмүгүнэн Саха сирин валовой региональнай бородууксуйата (ВРП) 2,6 трлн солк.куоһарда диэн иһитиннэрдэ.
