Саха сиринээҕи оҕо быраабыгар боломуочунайа Туйаара Васильева бастакы үс ыйдааҕы үлэтин түмүгүн уонна этиилэрин өрөспүүбүлүкэ аҕа баһылыгын кытары көрсүһүүгэ билиһиннэрдэ.
Айсен Николаев тулаайах уонна көрүүтэ-истиитэ суох оҕолор туһунан болҕомтону ирдииллэрин, ону тэҥэ, оҕолору иитэ ылар дьиэ кэргэттэр кыһалҕаларыгар, ыччат буруйу оҥоруутун сэрэтэр үлэлэри элбэтэргэ сорудахтаата.
«Биһиги оҕолорбут куттала суох эйгэҕэ олороллорун хааччыйыахтаахпыт, үүнэр кыахтаналларыгар сөптөөх усулуобуйаны тэрийиэхтээхпит. Саха сиригэр дьиэ кэргэн уонна оҕо интэриэстэрин көмүскээһиҥҥэ аналлаах киэҥ үлэ ыытыллар, сокуон базата тупсар, дойду бэрэсэдьиэнэ Владимир Путин Арассыыйаҕа оҕо саас уон сылын биллэрбит чэрчитинэн соруктар быһаарыллаллар. Бу үлэ түмүктэрэ бааллар, ол эрээри өссө элбэҕи оҥоруохтаахпыт», – диэн бэлиэтээн эттэ регион баһылыга.
Туйаара Васильева өрөспүүбүлүкэҕэ анал идэлээх төрөппүттэр институттарын сайыннарарга быстах кэмҥэ олорор дьиэни биэрэр наадатын бэлиэтээтэ. Итиэннэ инбэлиит оҕолору уонна кинилэр төрөппүттэрин өйүүр уонна кинилэргэ анал сирдэри тэрийэр туһунан боппуруостары көрдүлэр. Подросток оҕолорго өрнөспүүбүлүкэҕэ анал площадкалары арыйар былааннанар, онно кинилэр бэйэ-бэйэлэрин кытары бодоруһуохтара, айымньылаахтык сайдыахтара, спордунан дьарыктаныахтара.
Маны таһынан көрсүһүүгэ оҕо эт-хаан, психологическай өттүнэн куттал суох буолуутун тематын таарыйдылар. Ил Дархан оскуола иннинээҕи тэрилтэлэр уонна үөрэх тэрилтэлэрин нөҥүө төрөппүттэри, оҕолору кытта үлэни күүһүрдэр соругу туруорда.
