Эһиил, 2025 сылга ыытыллар үбүлүөйүнэй 30-с “Дыгын оонньууларын” күрэҕэр призовой пуонда үс төгүл үрдүүрүн туһунан “Спорт Якутии” хаһыат иһитиннэрэр.
Биһиги биир дойдулаахпыт, “Прогресс” ХЭТ генеральнай дириэктэрэ Алексей Семенович Пинигин алтыс төгүлүн сахалыы төрүт көрүҥнэргэ сүрүн успуонсарынан буолуоҕа.
Эрдэ оонньуулар кыайыылаахтара 1 мөлүйүөн солкуобайы ылар эбит буоллаҕына бу сырыыга 3 мөлүйүөнү уу харчынан тутуоҕа. Ону таһынан атын кыттааччылар эмиэ успуонсардартан, сүрүн партнердартан үчүгэй бириистэринэн наҕараадаланыахтара диэн эттилэр.
Манна даҕатан эттэххэ “Дыгын оонньуулара-2025” сүрүн күрэххэ 16 ыспарсымыан кыттара былааннанар. Инньэ гынан боотурдар сыл устата, “Үс хатыҥ” стадионугар тиийэн кыттар туһуттан сүүмэрдиир үс түһүмэҕи ааһыахтара. Түһүмэхтэр хаһан уонна хайдах быһыылаахтык ыытыллалларын туһунан сотору кэминэн бэчээттээн таһаарыахпыт.
Улуустааҕы “Саҥа олох” хаһыаты кытары бииргэ буолуҥ!
Сэмэн Жендринскэй, Саҥа олох
