22 От ыйа 22.07
  • 29°
  • $ 88,02
  • 96,04

Сыл саҕаланыаҕыттан 4 тыһ.тахса итирик суоппары туттулар

12:09, 13 июля 2016
Читайте нас на
Яндекс Новости
ЯДВ

2016 сыл саҕаланыаҕыттан итирик туруктаах 4 тыһ. тахса суоппар тутуллубут. Кинилэртэн 238-һа дьахтар. Бу сүрүн кыһалҕа буоларын ГИБДД өрөспүүбүлүкэтээҕи управлениетын начальнига Самсон Чупров эттэ.


Дьокуускай куоракка ордук элбэх итирик киһи уруулга олорор. Суолга куттал суох буолуутун хааччыйар инспектордар күн аайы 20-тэн 30-ка диэри арыгылаабыт суоппардары суолга тохтотоллор. От ыйын 1 күнүттэн 5-гэр диэри кинилэр ахсааннара 90 киһиэхэ диэри тиийбит.

«Сокуон төһө да кытааппытын иһин, Саха сирин олохтоохторо бу ыар буруй содула улаханын тиһэҕэр диэри өйдөөбөттөр. Былырыыҥҥыны кытта тэҥнээтэххэ, суолга быһылаан тахсыыта кыччаата, ол эрээри маннык быһыылааннарга өлбүт дьон ахсаана аҕыйаабат. Сыл саҕаланыаҕыттан суоппардар буруйдарынан 9 киһи өллө», — диир кини.

Массыына уруулугар итирик олорор дьахталлар ахсааннара үксүү турара долгутар. 238 автоледи тутуллубутуттан 6-та хос тохтотуллубуттар. Кинилэр 3 киһини суорума суоллаатылар.

Эрдэттэн сэрэтии үлэтэ ыытыллар эрээри, көдьүүһэ дуона суоҕун Чупров бэлиэтиир. Бу биир кэлим кыһалҕа буоларынан, сэрэтии үлэтэ автооскуолалартан саҕаланыахтаах.

«Ким да барыбытын долгутар кыһалҕаттан туора туруо суохтаах. Массыыналаах дьоҥҥо ким да кинилэргэ итирдэр утаҕы, ол иһигэр пиибэни кутуо суохтаах. Дьоҥҥо арыгылааһын содулун күннэтэ быһаарыахха, иһитиннэриэххэ!», — диир кини.

Следите за самым важным и интересным в Telegram-канале и WhatsApp-группе ЯСИА