Сыбаатай баһаара нэһилиэктэн биир килэмиэтир тэйбитин туһунан Орто Халыма баһылыгын солбуйааччы Александр Андреев атырдьах ыйын 6 күнүгэр киэһэ 22ч ааһыыта иһитиннэрбитэ.
Уоту утары нэһилиэк олохтоохторо бэйэлэрэ уонна Орто Халыматтан көмө дьон сылдьаллар. Түөрт тыраахтыр, үс уу баһар массыына, үс баһаарынай иһит, биэс уу мотуора, биэс мотопомпа уонна 25 сүгүү уоту умуруорааччы тэриллээхтэр.
«Атырдьах ыйын 6 күнүн киэһэтигэр уот нэһилиэктэн биир килэмиэтир хотугулуу-арҕаа тэйдэ. Түүн харабыл олохтонуо. ЫБМ, быыһыыр сулууспа үлэһиттэрэ Өлөөкө-Күөлүгэр быраҕыллыбыттара. Онно балаһыанньа эмиэ уустук», — диэбитэ Александр Андреев.
СӨ Нэһилиэнньэ олоҕор куттал суох буолуутун кэмитиэтин салайааччы Дмитрий Лепчиков ЫБМ аэромобильнай бөлөҕө Сыбаатайга бүгүн, атырдьах ыйын 7 күнүгэр барыаҕын иһитиннэрэн турар.
Санатар буоллахха, уот бэҕэһээ киэһэ олохтоох бириэмэннэн 19ч. 15 миэтэрэ түргэннээх күүстээх тыал түһэн, Алаһыай өрүһү нөҥүө ыстанан, Сыбаатай нэһилиэгэр ыкса чугаһаабыта. Нэһилиэнньэ олоҕор куттал суох буолуутун кэмитиэтэ дьоҥҥо докумуоннарын, малларын-салларын чөкөтүнэллэригэр сүбэлээбитэ.
