Мэҥэ Хаҥалас оройуонун суута кэтээн көрөр уорган ирдэбилин сороҕун билинэн, улуус дьаһалтатын Аллараа Бэстээх бөһүөлэгэр экологияны алдьатыыны туоратарга эбээһинэстээтэ диэн Саха сирин сууттарын холбоһуктаах пресс-сулууспата иһитиннэрэр.
Бэрэбиэркэ түмүгүнэн, бөһүөлэккэ хомунаалынай тобохтор икки сокуоннайа суох сыбаалкалара туһаныллаллара билиннэ. Учаастактар тобохтору харайар эбийиэктэр судаарыстыбаннай реестрдэригэр киллэриллибэтэхтэр. Бөҕү уматыы мэлдьи тахсар, оттон салгын боруобата киртитэр эттиктэр көҥүллэммит концентрацияларын таһымын куоһарарын көрдөрдө.
Суут улуус дьаһалатын дьайыытын сокуоннайа суоҕунан аахта. Уураах күүһүгэр киирбит күнүттэн 12 ый устата дьаһалта тобохтору харайарга анаммыт сир учаастактарын туһаныыны тохтотуохтаах уонна сири чөлүгэр түһэрии уонна консервациялааһын быраабылаларыгар олоҕуран, территориялары чөлүгэр түһэриэхтээх. Суут уурааҕа сокуоннай күүһүгэр киирэ илик.
