27 Тохсунньу 27.01
  • -48°
  • $ 73,82
  • 83,32

Стендэҕэ ытыыга Саха сирин кыргыттара икки мэтээли ыллылар

21:20, 07 июля 2016

“Азия оҕолоро” норуоттар икки ардыларынааҕы 6-с спортивнай Оонньуу бырагырааматыгар стендэҕэ ытыы, сахалыы ыстаныылар, хапсаҕай уонна хуреш тустуу көрүҥнэрэ киллэриллибиттэр. Стендэҕэ ытыыга кыргыттарбыт Саха сирин хамаандатыгар икки мэтээли аҕаллылар.


Күрэхтэһии бастакы күнүгэр кыргыттар киирсэн, Казахстан, Татарстан уонна Саха сирин икки хамаандатыттан барыта 18 спортсмен кытынна. Стендэҕэ ытыы спортинг көрүҥэр маарыҥныыр. Ол эрээри арыый да атын. Бу күн СКИТ уонна ТРАП эрчиллиилэргэ тургутуһан, бэргэн, сатабыллаах ытааччылар инники күөҥҥэ таҕыстылар.

Тыҥааһыннаах киирсиилэр түмүктэринэн, СКИТ көрүҥнэргэ Казахстан кыыһа Александра Горбачева кыһыл көмүс, Татарстан хамаандатын ытааччыта Елизавета Евграфова боруонса, оттон биһиги кыыспыт Сайыына Старостина (Саха сирин бастакы хамаандата) боруонса мэтээли ылары ситистилэр.

ТРАП-ка бастакы миэстэҕэ Полина Князева (Татарстан), иккискэ Вероника Иванова (Саха сирин бастакы хамаандата), үһүскэ Екатерина Иванова (Казахстан) таҕыстылар.

Стендэҕэ ытыыга эппиэтинэстээх судьуйа Марк Егоров иһитиннэрбитинэн, күрэхтэһиигэ 2000 сыллаах төрүөх кыргыттар кыттыбыттар. «Биһиги кыргыттарбыт биир эрэ сыл дьарыктаннылар. Ону даҕаны Казань куоракка баран. Биһиэхэ дьарыктанарбытыгар усулуобуйабыт суох этэ. Ол да буоллар, оҕолорбут көрдөрүүлэрэ үчүгэй», – диэн эбэн биэрдэ.

Оттон кылаабынай судьуйа Сергей Лыков «Олимпиец» комплекс спортивнай ирдэбилгэ толору эппиэттиирин эттэ.

Биһиги өрөспүүбүлүкэбитигэр аан бастакытын ыытыллар стендэҕэ ытыы күрэхтэһиитин көрөөрү, бэҕэһээ «Олимпиец» комплекска үгүс киһи тоҕуоруста. Маҕанныыр суол 6-с килэмиэтиригэр баар урукку «Бэргэн» комплексы саҥардан, өрөмүөннээн, аатын уларытан, тута саҥалыы тыыннаммыта үгүс киһини сөхтөрдө. Материальнай-техническэй базата бөҕөргөөн, спортсменнарга табыгастаах усулуобуйа олохтонон, инникитин оҕолор уонна улахан дьон атын регионнарга баран дьарыктаммакка, Дьокуускайга эрчиллиэхтэрэ.

0
0
27 января 27.01
  • -48°
  • $ 73,82
  • 83,32