Ахсынньы 2 күнүттэн 18-гар диэри Москваҕа уонна Санкт-Петербурга Саха Өрөспүүбүлүктэтин күннэрэ ыытылла тураллар. Бу күннэр Саха сирэ Россия судаарыстыбатын састаабыгар киирбитэ 390 сылын бэлиэтиир тэрээһиннэр чэрчилэринэн бэлиэтэнэллэр.
Ахсынньы 2 күнүгэр Санкт-Петербурга икки бэлиэ түгэн буола ааста. Россия президенин иһинэн үлэлиир Саха сирин бастайааннай бэрэстэбиитэлистибэтин туруорсуутунан, Петербург куорат Выборгскай оройуонугар учуонай-лингвист, общественнай-политическай деятель Семен Новгородов аатынан сквер арылынна. Саханы саха дэппит, төрөөбүт тылбытын сурукка түһэрэн, алфавит оҥорон үйэтиппит учуонайбыт аатынан сымара таас Диагональная, Грибалева, Новолитовская уулуссалар быһа силбэһиилэригэр түһэрилиннэ. Мантан антах Выборгскай оройуон дьаһалтата сквери тупсарыыга үлэни ыытара күүтүллэр.
Сквер арыллыытын кэмигэр оройуон баһылыга Виктор Полунин Семен Новгород төрөөбүт улууһуттан — Чурапчыттан кэлэн кыттыыны ылбыт оройуон баһылыга Степан Саргыдаевка бииргэ үлэлэһиигэ сөбүлэҥ чэрчитинэн сквери сахалыы тыыннаан оҥорорго көмөлөһүө диэн эрэлин биллэрдэ.
Салгыы Саха сирин дэлэгээссийэтэ Ленинградскай уобалас Кировскай оройуонугар федеральнай таһымнаах култуурунай нэһилиэстибэ эбийиэгэр — «Невский пятачок» диэн ааттанар интернациональнай аллеяҕа «Саха буойуттарыгар» мемориальнай бэлиэ ууруллутугар кыттыыны ыллылар. Санатан эттэххэ, бу ытык сиргэ Аҕа дойдуну көмүскүүр Улуу сэрии кэмигэр Ленинград оборуонатыгар кыттыбыт араас куораттар саллааттарыгар сүгүрүйүү-өйдөбүнньүктэр тураллар.
Мустубут дьону Ленинградскай уобалас дьаһалтатыттан Евгений Барановскай эҕэрдэлээтэ. Саха сирин аатыттан Россия президенин иһинэн үлэлиир бастайааннай бэрэстэбиитэл Андрей Федотов тыл эттэ уонна бүттүүн саха норуотун аатыттан махталын биллэрдэ.
Бу бэлиэ күн аатырбыт Мариинскай тыйаатырга «Ньургун Боотур» олоҥхо-оператынан түмүктэннэ. Режиссер Андрей Борисов туруорбут оператыгар Суорун Омоллоон аатынан опера уонна балет тыйаатырын артыыстара, сүрүн оруолга норуодунай артыыс Александр Емельянов, судаарыстыбаннай филармония хора, симфоническай оркестр, Олоҥхо тыйаатырын артыыстара уонна музыканнара, «Виртуозы Якутии» скрипачтар ансаамбыллара кыттыыны ыллылар.
Саха Өрөспүүбүлүктэин култуураҕа уонна духуобунай сайдыыга миниистирэ Юрий Куприянов саҥалыы тыыннаммыт туруоруу халыыба баараҕайынан ураты буолбутун уонна Россия хайдахтаах курдук баай културалаах норуоттардааҕын арылхайдык көрдөрдө диэн астына бэлиэтээтэ.
Бу курдук Саха сирин күннэрэ Санкт-Петербурга өрө көтөҕүллүүлээхтик аастылар. Салгыы дойдубут тэбэр сүрэҕэр араас хабааннаах тэрээһиннэр ыытыллыахтара.
Ааптар: Анфиса Слепцова, Россия суруналыыстарын сойууһун чилиэнэ, Санкт-Петербург к.
