Владивостокка «Азия оҕолоро» оонньууларга пляжнай волейболга күрэхтэһии саҕаланна. Бастыҥ хамаанда аатын Узбекистан, Кыргызстан, Армения, Саха сирэ, СФО, ону таһынан Приморскай кыраай икки хамаандалара былдьаһыахтара. Саха кыргыттарын хамаандата Кыргызстан волейболистарын бастакы матчка 2:1 ахсаанынан кыайдылар.
Саха сириттэн Динара Емельянова уонна Анжелика Павлова бастакы оонньуулара олус тыҥааһыннаах буолла. Кыргыттар этэллэринэн, бастакы баартыйаҕа 12:21 ахсаанынан хоттордулар, бу кинилэр саҥа хонууга уонна кумахха адаптацияламмыттар. Иккис баартыйаҕа саха хамаандата эрэллээхтик 21:14 ахсаанынан кыайыыны ситистэ. Үһүс, быһаарыылаах оонньууга эмиэ сахалар — 15:6 ахсаанынан кыайдылар.
Икки кыыс Амма улууһуттан сылдьаллар, волейболунан 5-6 саастарыттан дьарыктаналлар. Бүгүн кинилэргэ Армения сүүмэрдэммит хамаандатын кытта өссө биир оонньуу буолуоҕа.
