Харбиҥҥа Х Арассыыйа-Кытай ЭКСПО былаһааккатыгар Саха сирин баһылыга Айсен Николаев Хэйлунцзян провинциятын губернатора Лян Хуэйлин хотуну кытта көрүстэ. Өрүттэр 2026-2028 сылларга холбоһуктаах дьаһаллар былааннарын тэрийиини дьүүллэстилэр.
«Саха сирин уонна Хэйлунцзян өр кэмнээх уонна эрэллээх бииргэ үлэлээһин сыһыаннаһыыларын ситимнииллэр. 2023 сыллаахха илии баттаммыт Сөбүлэһии саҥа таһымҥа таҕыста», — диэн МАХ ханаалыгар Айсен Николаев суруйда.
Эрэгийиэн баһылыга холбоһуктаах дьаһаллар былааннарыгар эргиэн-экэниэмикэ уонна бырамыысыланнастан саҕалаан үөрэхтээһиҥҥэ, доруобуйа харыстабылыгар, култуураҕа уонна гуманитарнай атастаһыыларга тиийэ бииргэ үлэлээһин тутаах хайысхаларын хабыахтааҕын бэлиэтээтэ.
«Хотун губернатор Саха сирэ хайыы-үйэ сүүрбэттэн тахса сыл устата Харбиннааҕы аан дойдутааҕы эргиэн-экэниэмикэ дьаарбаҥкатыгар уонна Арассыыйа- Кытай ЭКСПО-гар көхтөөхтүк кыттарын бэлиэтээтэ уонна биһиги регионнарбыт икки ардыларыгар практическай бииргэ үлэлээһини салгыы сайыннарыыга эрэллээҕин биллэрдэ», — диэн Айсен Николаев кэпсээтэ.
Өрүттэр Арассыыйа уонна Кытай икки ардыларыгар саҥа транспортнай сибээһи үөскэтии улахан суолталаах чааһын быһыытынан «Джалинда – Мохэ» бырайыагы бииргэ олоххо киллэриини туспа дьүүллэстилэр.
“Ити кытай партнердарыгар таһаҕаһы тиэрдии болдьоҕун уонна сыанатын сарбыйыыга саҥа кыахтары арыйар уонна аан дойдутааҕы логистиканы сайыннарыыга Саха сирин оруолун күүһүрдэр”, — диэн Ил Дархан тоһоҕолоон бэлиэтээтэ. Ону тэҥэ хотугу уонна Арктика территорияларын сайыннарыыга, туризмҥа, инновацияҕа, креативнай индустрияларга уонна гуманитарнай бииргэ үлэлээһиҥҥэ — Хэйлунцзянҥа саха оҕолорун реабилитациялааһынтан устудьуоннары үөрэх хайысхатыгар атастаһыыга тиийэ болҕомтолорун уурбуттара.
«Кытай партнердарыгар уонна тус бэйэм тойон Лян Хуэйлиҥҥа ис хоһоонноох кэпсэтии иһин махтанабын. Харбиҥҥа бу күннэр тэтимнээх бырагыраамалар Арассыыйа уонна Кытай сыһыаннара саҥа таһымҥа тахсыбыттарын, Саха сирэ бу партнерствоҕа бэйэтин практическай кылаатын киллэрэрин өссө төгүл бигэргэттэ», — диэн Айсен Николаев түмүктээтэ.
