Саха сирин баһылыга Айсен Николаев Өлүөнэтээҕи бассейн уу салалтатын (Ленское БВУ) салайааччыта Петр Аргуновы кытта кэпсэттэ. Сүрүн тиэмэнэн эрэгийиэн өрүстэригэр муус барыыта буолла.
«Муус устар уонна сааскы халаан уута ааһар кэмигэр өрөспүүбүлүкэ олохтоохторун куттала суох буолууларын хааччыйыы биир сүрүн соругунан хаалар. Бары интэриэстээх биэдэмистибэлэр чуолкай бииргэ үлэлээһиннэрин уонна информацияны суһаллык атастаһыыны хааччыйыы улахан суолталаах», — диэн Айсен Николаев бэлиэтээтэ.
Петр Аргунов билиҥҥи гидрологическай быһыы-майгы уонна Өлүөнэтээҕи БВУ федеральнай уонна эрэгийиэн структураларын кытта сааскы халаан уутун куттала суох аһардарга ылынар дьаһалларын туһунан иһитиннэрдэ. Итини сэргэ гидротехническай тутуулары уонна экологияҕа кутталлаах эбийиэктэри уу ааһыан иннинэ бэрэбиэркэлээһин түмүктэрин дьүүллэстилэр.
Уу ресурсаларын Федеральнай ааҕыныстыбатын өйөбүлүнэн Өлүөхүмэ уонна Нам оройуоннарыгар Өлүөнэ өрүскэ, Орто Халыма оройуонугар Халыма эбэҕэ уонна Ньурба улууһугар Бүлүү өрүскэ үлэ кээмэйэ улааппыта. Чуолаан, мууһу хараардыы иэнэ 161 гектарга диэри улаатта.
2026 сылга мууһу чарааһырдар үлэ Саха сирин 14 оройуонугар ыытылынна. 92 харар кутталлаах учаастакка 859 гектар иэннээх мууһу хараардыы уонна 41 биэрэстэ усталаах мууһу эрбээһин үлэтэ оҥоһулунна.
Өрүттэр итини сэргэ ууну харайар эбийиэктэр халаан уутун аһарарга бэлэмнэрин дьүүллэстилэр уонна салгыы уу хаһаайыстыбатын дьаһалларын былааннарын бэлиэтээтилэр.
“Уу ресурсаларын Федеральнай ааҕыныстыбатын уонна Өлүөнэтээҕи бассейн уу салалтатын кэлэктииптэрин ыытылыбыт үлэ уонна Саха сирин олохтоохторугар куттал суоһаабатын хааччыйыы иһин үлэҕитигэр махтанабын», — диэн Айсен Николаев эттэ.
Көрсүһүү түмүгүнэн муус, халаан уута ааһар кэмигэр хардарыта сибээһи күүһүрдүүгэ уонна информацияны суһаллык атастаһыыга инники хардыылар быһаарылыннылар.
