Россия УФСБ Саха сиринээҕи салаатын архыыбын матырыйаалларыгар олоҕурбут «Хики Филмз» киинэ-хампаанньа «Сахафильмы» кытта «Операция «Холодное золото» киинэ устар. Биэдэмистибэ пресс-сулууспата СИА-ҕа иһитиннэрдэ.
Аҕа дойду улуу сэриитин кэмигэр буолбут, урут уопсастыбаннаска аһаҕастык кэпсэммэтэх история чахчыларынан уһуллар киинэ Кыайыы 75 сылыгар уонна Саха сирин куттал суох буолуутугар уорган тэриллибитэ 100 сылыгар ананар.
Бырайыагы Ил Дархан өйүүр. Киинэни устууга профессионаллар үлэлииллэр. Ааптар Любовь Борисова («Надо мною солнце не садится»), режиссер-туруорааччы – Петр Хики («Күлүк хомус»), оператор-туруорааччы – Иван Семенов («Кэскил 2», «Агент Мамбо», «Костер на ветру» и т.п.), худуоһунньук-туруорааччы – Саргылана Скрябина («Муммуттар», «Тойон кыыл», «Тиэтэйбит» и т.п.), продюсер – Сардана Саввина («Костер на ветру», «Тойон кыыл», «Надо мною солнце не садится» и т.п.). Кинилэри сэргэ биллэр Саха сирин уонна Россия кинематографиятын бэрэстэбиитэллэрэ кытталлар. Көстүүм тигиитигэр, реквизиттэри, декорация оҥоруутугар элбэх үлэ ыытылынна. Хаҥалас улууһун Хачыкаатыгар устуллар.
Билигин COVID-19 тарҕаппат туһуттан устуу тохтоон турар. Устар бөлөх сотору кэминэн үлэ салҕанарыгар эрэллээх.
