Мэҥэ Хаҥалас улууһуттан социальнай ситимнэринэн биллэрии тарҕанна. «Сэриигэ сылдьыбыт аҕа уонна уол туһунан суруйан ыытаргытыгар«, — диэн ис хоһоонноох иһитиннэриигэ нэһилиэнньэ болҕомтотун уурда.
Бу күннэргэ батсаап ситиминэн маннык ис хоһоонноох сурук тарҕанна: «Дорооболоруҥ. Бу Мэҥэ Хаҥаластан тиийдибит. Биир көрдөһүүлээх. Эһиги улуустан эбэтэр нэһилиэктэн биир ыалтан сэриигэ сылдьыбыт аҕа уонна уол бааллар дуо? Матырыйаал көрдүүбүт🙏. Биографиялара уонна сатанар буоллаҕына хаартыскалара, атын дааннайдара🙏🙏🙏«.
Салгыы төлөпүөн нүөмэрэ суруллар: 89245919381. Титова Любовь Дмитриевна.
2020 сылга Аҕа дойду улуу сэриитигэр Кыайыы 75 сылын бэлиэтээбиппит. Төһө да сыстыганнаах ыарыынан харантыын биллэриллибитин иһин, дьон араас онлайн-аахсыйаларга кыттан, бырайыактары үлэлэтэн, история тыыннаах хааларыгар үтүмэн дьыала оҥоһулунна.
Билигин мэҥэ хаҥаластар аҕа уонна уол бииргэ сэриигэ (1941 -1945 с.с.) сылдьыбыттарын чинчийэр үлэни тэрийбиттэрин кэпсииллэр. «Холобур, иккиэн уоттаах сэриигэ эбэтэр биирэ үлэ фронугар буолуон сөп. Эбэтэр иккиэн үлэ фронугар. Ким эрэ туһунан истибит буоллаххытына, ыытыаххыт диэн эрэнэбит«, — диэн суруйдулар.
Саха сирин олохтоохторо аахсыйаны өйөөн, нэһилиэнньэни «кытаатан чопчу билбэт да буоллаххытына үтүө саҕалааһыны өйөөҥ, сүбэлээн иҥин суруйуҥ» — диэн ыҥырыы таһаардылар.
Любовь Дмитриевна иһитиннэрбитинэн, бу бырайыагы былырыын Социалистическай үлэ Геройа Т.Г. Десяткин аатынан Тумул орто оскуолатын үөрэнээччитэ Карина Эверстова саҕалаабыт. «Улууспутугар «Ини-биилэр» диэн бырайыак үлэлиир, онтон сиэттэрэн бу аахсыйа оҥоһуллар. Үөрэтиллибэтэх тиэмэ буолан уустуктардаах, бүтүн өрөспүүбүлүкэ дьоно кыттарыгар эрэллээхпит. Салгыы үлэлииргэ бэлэммит«, — диэтэ кини.
