Эксээмэн туттарааччылары эрийэ-буруйа олордуу, дезинфекциялыыр сириэстибэлэри туттуу, термометрдар, биирдэ эрэ туттуллар уу иһэр ыстакааннар уонна да атын элбэх — Биир кэлим эксээмэни тэрийээччилэр оскуоланы бүтэрээччилэр доруобуйаларыгар куттал суоһаабатын туһугар үлэлиэхтээхтэр. Үөрэх министиэристибэтигэр дойду кылаабынай эксээмэнин туттарыыга бэлэмнэнии туһунан кэпсээтилэр.
Бэс ыйын 16, 25, 26 күннэригэр эксээмэн ыытыллар пууннара бэлэмнэнии тэрээһиннэрин ыытыахтара, оттон бэс ыйын 29 күнүгэр оҕолор кыттыыта суох БКЭ-ни боруобалыахтара — техническай өрүттэрин, систиэмэни уонна эксээмэн пууннарын үлэһиттэрин.
Тустаах миниистир Михаил Сивцев эрдэ иһитиннэрбитинэн быйыл Роспотребнадзор ирдэбилинэн, оҕолору эксээмэн кэмигэр эрийэ-буруйа олордуохтара, социальнай дистанция 1,5 м тутуһуллуоҕа. Дезинфекциялыыр сириэстибэлэр пууннар аайы баар буолуохтара, салгыны ыраастыыр тэриллэр, кыраадыһы кэмниир термометрдар уонна да атын оҕоҕо куттал суоһаабатыгар ылыллар миэрэлэринэн толору хааччыллыахтара. Эксээмэн иннинэ генеральнай убуорка оҥоһуллуоҕа. Бу барыта Саха сирин үрдүнэн булгуччулаахтык тутуһуллуоҕа.
Холобур, Үөһээ Бүлүү улууһун территориятыгар биэс сиргэ баазаланан эксээмэни ыытар пуун үлэлиэҕэ. Манна 98 быйыл оскуоланы бүтэрээччилэр уонна биэс ааспыт сыллааҕылар итиэннэ өрөспүүбүлүкэ атын үөрэҕин тэрилтэлэрин бүтэрээччилэр кыттыыны ылыахтара. Үөрэх управлениетын начальнига Спиридон Борбуев иһитиннэрбитинэн, БКЭ-ни хаачыстыбалаахтык туттарыыга анаан ирдэнэр бары миэрэлэр тутуһуллаллар, пууннар техническай өттүнэн хааччыллаллар.
