Саха сиригэр 6000 тахса байыаннай киирсиилэр бэтэрээннэрэ олороллор. Аҕа дойдуну көмүскээччилэр күннэрин көрсө Дьокуускайга кинилэри кытары көрсүһүү буолла.
Манна Бүлүүттэн, Горнайтан, Мэҥэ-Хаҥаластан, Намтан, Уус-Алдантан уопсастыбаннай тэрээһиннэр бэрэстэбиитэллэрэ кытыннылар. Кинилэри СӨ Бырабыыталыстыбатын аатыттан вице-премьер Сергей Местников, норуот дьокутааттара эҕэрдэлээтилэр.
Бэтэрээннэр Сэбиэттэрин бэрэссэдээтэлэ Вильям Иванов Саха сиригэр Афганистааҥҥа, Вьетнамҥа, Сирияҕа, Соҕуруу Осетияҕа сулууспалаабыт 6000-тан тахса буойун олорорун иһитиннэрдэ. Бэтэрээннэр билигин кыргыһыы хонуутугар охтубут буойуттар ааттарын үйэтитиигэ, байыаннай-патриотическай, байыаннай-спортивнай кулууптарга, поисковай-краеведческай, кадетскай, казацкай тэрээһиннэргэ, волонтердар этэрээттэригэр көмөлөһөллөрүн эттэ.
