Саха сирэ Татарстааны кытта култуурунай уонна урбаан эйгэлэригэр бииргэ үлэлэһиитин кэҥэтэр. Балаҕан ыйын 15 күнүгэр Саха Өрөспүүбүлүкэтин Татарстаан сиригэр-уотугар норуоттарын култууратын уонна үгэстэрин харыстыыр, сайыннарар «Кыра Саха сирэ» диэн АНО уонна «Саха сиригэр оҥоһулунна» урбаанньыттар Ассоциациялара стратегическай бииргэ үлэлэһии уонна партнёрство туһунан сөбүлэҥҥэ илии баттаатылар. Бу туһунан sakha.gov.ru иһитиннэрэр.
Докумуоны «Кыра Саха сирэ» АНО дириэктэрэ Вилена Попова уонна «Саха сиригэр оҥоһулунна» Ассоциация Сэбиэтин чилиэнэ Ирина Атласова илии баттаатылар. Кинилэр Саха сирин норуоттарын култуурунай нэһилиэстибэтин киэҥник тарҕатар, гастрономическай туризмы сайыннарар уонна Приволжскай федеральнай уокурукка өрөспүүбүлүкэ оҥорон таһаарааччыларын бородууксуйатын тарҕатар соруктаах күүстэрин холбуурга быһаардылар.
Биир сүрүн холбоһуктаах бырайыагынан Казань куорат ЦУМ-угар Саха сирин официальнай павильонун арыйыы буолуоҕа. Саҥа былаһаакка сэтинньи 4 күнүгэр, Норуот сомоҕолоһуутун күнүгэр, Татарстаан киин куоратын ортотугар үлэтин саҕалыаҕа.
Павильон култуурунай, быыстапкалыыр уонна эргиэн былаһааккаларын холбуоҕа. Манна саха национальнай көстүүмнэрин уонна материальнай култуура малларын-салларын куруутун көрдөрөр экспозицияны тэрийэр, «Саха сиригэр оҥоһулунна» Ассоциация резиденнэрин бородууксуйатын билиһиннэрэр, ону тэҥэ Казань олохтоохторун уонна ыалдьыттарын өрөспүүбүлүкэ үгэстэрин кытта билиһиннэрэр тэрээһиннэри ыытыахтара.
