Россия сибээскэ миниистирэ Николай Никифоров RT телекомпанияҕа интервью биэрдэ. Коммуникацияны сайыннарыы туһунан этэригэр кини аҕыйах киһилээх нэһилиэктэргэ интернети киллэриигэ ситиһиилээхтик үлэлиир Саха сирин холобур быһыытынан аҕалла.
RT корреспондена Дэниэл Бушелл, былаас уоргана дойду иһинээҕи интернеккэ хонтуруолу олохтуу сатыырын курдук санаа баарын, ол тула миниистир санаатын үллэстэригэр ыҥырда.
«Россияҕа былаас өттүттэн интернети хонтуруоллааһын суох. Судаарыстыбаны сетевой инфраструктура инвесторын эрэ быһыытынан көрөбүт. РФ сирэ-уота киэҥинэн, уустук климатическай усулуобуйалааҕынан сибээскэ наадыйыыта улахан», —диэтэ Никифоров.
Ону таһынан ыраах баар уонна аҕыйах дьонноох-сэргэлээх нэһилиэктэри интернетинэн хааччыйыыга, коммуникацияны сайыннарыыга судаарыстыба ылар оруола, өйөбүлэ муҥура суох улаханын кини ыйда.
«Россия президенэ Владимир Путин 250-тан элбэх киһилээх нэһилиэнньэлээх пууннар оптоволоконнай сибээс нөҥүө интернеттээх буолалларын былаас уоргана хааччыйарыгар сорудахтаата. Маныаха кэккэ ситиһиилэр баалларын хайаатар да этиэх тустаахпын. Онуоха «Ростелеком» инфраструктурата туһаныллар», — диэтэ миниистир.
Холобур быһыытан миниистир Саха сиригэр оптоволоконнай магистральнай тиһик тардыллыбытын кэпсээтэ. Судаарыстыба уонна чааһынай дьон хардарыта дьайсыылаах үлэлэринэн бу ситиһиллибит.
«Атын регионнарга Саха сирин уопута үтүө холобур буолуон сөп», — диир кини.
