Үлэ дьонун уруйдуур 1-кы Маай бырааһынньыгын «СӨ ОДьКХ» ГУП Ньурбатааҕы филиала, мэлдьи буоларыныы, үлэ үөһүгэр көрсөр. Улуус олоҕу-дьаһаҕы хааччыйар тыын суолталаах тэрилтэлэриттэн биирдэстэрэ буолан, тэрилтэ үлэтэ биир да күҥҥэ сөҕүрээн-мөлтөөн көрбөт.
Оттук сезона түмүктэнэ илик буолан, элбэх киһилээх улахан кэлэктиип туохтан да тутулуктаммакка, үлэлээбитин курдук үлэлээн, дьону-сэргэни сылааһынан уонна уунан хааччыйар.
«СӨ ОДьКХ» ГУП Ньурбатааҕы филиалын бүгүҥҥү уонна быйылгы былааннаах үлэтин туһунан тэрилтэ салайааччыта Алексей Тихоновы кытта кэпсэттибит.
— Оттук сезона этэҥҥэ ааһан иһэр, — диир Алексей Степанович. — Улуус 15 нэһилиэнньэлээх пуунугар 40 хочуолунайы үлэлэтэбит. Хочуолунай хаһаайыстыба наадыйыытыгар анаан бэйэбит массыынабытынан 3254 т Киров чоҕун тастыбыт. Кировтааҕы чоҕу мунньар ыскылааттан 1212 т Киров чоҕун уонна 925 т Дьабарыкы Хайа таас чоҕун биһигини кытта бэдэрээттэһэн «Антипин И.А.» ИП Хорулаҕа таста. Итиэннэ Иирэлээхтэн 2600 т сиикэй ньиэби «СахаСпецТранс» ХЭТ аҕалбыта.
Коронавирус инфекциятын кытта сибээстээх уустук эпидемиологическай быһыы-майгы кэмигэр биһиги тэрилтэбит сылааһынан хааччыйар 40 эбийиэгэ уонна уунан хааччыйар 8 эбийиэгэ бары күннээһи эрэһииминэн үлэлии тураллар. Хочуолунайдарга уонна да атын эбийиэктэргэ ураты эрэһиим олохтонно. 502 киһилээх сүрүн уонна инженернэй персонал ыарыыттан сэрэхтээх буолуу бары миэрэлэрин тутуһан үлэлэрин миэстэтигэр үлэлии сылдьаллар. 65-тан аҕа саастаах 7 киһини «самоизоляцияҕа» уонна тэйиччиттэн үлэҕэ көһөрдүбүт. Үлэһиттэр 6%-нара тэйиччиттэн үлэлии сылдьаллар.
Дьон доруобуйатын харыстыыр уонна кутталлаах ыарыы тарҕаныытын бохсор сыаллаах, «СӨ ОДьКХ» биһиги филиалбытыгар 277 л антисептическай уонна дезинфекциялыыр сириэстибэлэри (Аквабриз, гипохлорид кальция), биирдэ кэтиллэр 2100 медицинскэй маасканы ыыппыта. Улуус оперативнай ыстааба элбэхтэ кэтиллэр 300 медицинскэй маасканы биэрдэ. Инньэ гынан тэрилтэ оперативнай персонала тус биирдиилээн көмүскэнэр сириэстибэлэр уонна антисептическай сириэстибэлэр сөптөөх саппааһынан хааччылынна.
Быйыл Ньурба оройуонугар ОДьКХ тэриллибитэ үбүлүөйдээх 60 сылын туолар. Үбүлүөйдээх тэрээһиннэр чэрчилэринэн сыл саҥатыттан «60 үтүө дьыала» аахсыйа биллэриллибитэ. «ОДьКХ» ГУП бэтэрээннэригэр, соҕотоҕун олорор кырдьаҕастарга, инбэлииттэргэ, тыыл бэтэрээннэригэр хаардарын түһэрэн таһан, мастарын хайытан биэрдилэр. Элбэх оҕолоох ыалларга бастакы уочарат наадалаах табаардарын ыларга көмөлөстүлэр. Ньурбачааҥҥа былаһаакканы, Сүлэҕэ оҕо былаһааккатын, Чуукаарга оҕо саадын территорияларын хомуйдулар, Маарга от тастылар. Маны таһынан өссө биир улахан суолталаах тэрээһиннэрэ — Ньурба к. Убайаан микро-оройуонугар ОДьКХ скверин тутар былааннаахтар.
Кэлэктиип киэн туттар чулуу үлэһиттэринэн «Убайаан» учаастак хачыгаара, РФ ОДьКХ бочуоттаах үлэһитэ, «СӨ ОДьКХ» ГУП бэтэрээнэ Владимир Ващенконы, учаастак маастара, ОдьКХ бэтэрээнэ Валерий Николаевы, «Ньурбачаан» учаастак электросварщига Иван Угапьевы, «Маар» учаастак хачыгаара Валентин Васильевы, «Амакинка» учаастак слесарь ремонтнига Михаил Иванову уо.д.а. ааттыыллар.
— Уу суола аһылыннаҕына Дьабарыкы Хайаттан 41700 т таас чох аҕалыллыахтаах. Бу Ньурба к. уонна нэһилиэктэринэн тыырыллыаҕа. Ол иһигэр Ньурба к. — 39570 т, Чуукаарга 630 т уонна Маалыкайга 1500 т. Өрөмүөн үлэтин бырагырааматынан быйыл 18 мөл. 328 тыһ. солк. үлэни ыытыахтаахпыт. 6 хочуолу, 1,8 км ититии ситимин уонна 1,2 км уу ситимин уларытарга былаанныыбыт. Инвестиционнай бырагырааманан былырыыҥҥы үлэбитин салҕанан, автовесовой тутулла турар.
Түгэнинэн туһанан, «СӨ ОДьКХ» ГУП Ньурбатааҕы филиалын салалтатын уонна профкомун аатыттан Саас уонна Үлэ бырааһынньыгынан — 1 Маайынан — улуус бары үлэлээн иитиллээччилэрин уонна олохтоохторун, итиэннэ Ньурба улууһугар ОДьКХ тэриллибитэ 60 сыллаах үбүлүөйүнэн ОДьКХ бэтэрээннэрин уонна үлэһиттэрин итиитик-истиҥник эҕэрдэлиибин! Барыгытыгар үтүө доруобуйаны, дьолу-соргуну уонна табыллыыны баҕарабын, — диэн салайааччы санаатын тириэрдэр.
