Саха сирин баһылыга Айсен Николаев өрөспүүбүлүкэ бырабыыталыстыбатын уонна дьаһалтатын салалтатын кытта мунньах ыытта. Сүрүн тиэмэнэн Россия бырабыыталыстыбата бигэргэппит Уһук Илин социальнай-экономическай сайдыытын Тосхолун толоруу буолла.
Айсен Николаев федеральнай дьаһаллар былааннарын бэлэмнээһиҥҥэ Саха сирин интэриэстэрин учуоттааһыны хааччыйарга сорудахтаата. Кини этэринэн, саҥа оҥорон таһаарыылары, технологиялары уонна креативнай индустриялары өйөөһүн, ону тэҥэ профильнай үөрэхтээһини сайыннарыы олохтоохторго ирдэнэр идэлэри баһылыырга, үлэҕэ киллэрэргэ уонна бэйэ дьыалатын сайыннарарга ордук кыаҕы арыйыахтаах.
Мунньахха Россия бырабыыталыстыбата бигэргэппит дьон сыыппараҕа билиилэрин таһымын үрдэтии кэнсиэпсийэтин дьүүллэстилэр. Саха сирин баһылыга оҥоһуу өй сайдыытыттан саҥа кыахтар үөскүүллэрин, ол эрээри кутталлар эмиэ улааталларын бэлиэтээтэ. Оҕолору кыра эрдэхтэриттэн интернеккэ куттала суох быһыыга-майгыга үөрэтиэххэ наада. Бу билии улахан дьоҥҥо, ордук саастаах дьоҥҥо эмиэ наада: тус дааннайдары көмүскүүр, албыны билэр уонна цифровой өҥөлөрүнэн эрэллээхтик туһанар буолуу улахан суолталаах.
Оҕо-ыччат спордун сайыннарыы кэҥэтиллибит федеральнай былаанын туспа көрдүлэр. Спортивнай-чэбдигирдэр лааҕырдары уонна кииннэри арыйыыны, оскуола спортивнай кулууптарын өйөөһүнү уонна саҥа эбийиэктэри тэрийиигэ инвестордары тардыыны быһаарыстылар. Саха сирин бырабыыталыстыбатыгар адаптивнай спордка ураты болҕомтону ууран бу үлэни тэрийэргэ сорудахтанна. Инбэлиит оҕолор бэлэмнэммит тренердэр салалталарынан тиһигин быспакка дьарыктанар кыахтара улахан буолуохтаах.
Өссө биир улахан боппуруос — хаһаайыстыбалары кыстыкка аһынан хааччыйыы. Өрөспүүбүлүкэҕэ от, сиилэс уонна сенаж бэлэмнэниитэ салҕанар. Айсен Николаев сүөһү сиир отун бэлэмнээһиҥҥэ хаалыылаах оройуоннарга ураты болҕомтону уурарга сорудахтаата. Хаһаайыстыбалар кыстыкка сөптөөх саппаастаах киириэхтээхтэр, тоҕо диэтэххэ, сүөһү ахсаана харыстаныыта уонна тыа ыалларын дохуота итинтэн тутулуктаах.
