Уустук суоллаах-иистээх Усуйаана улууһугар болдьоҕун иннинэ куоластааһын салҕанан барар диэн СӨ Киин быыбардыыр хамыыһыйата иһитиннэрэр, суруйда Саха сирэ саайт.
Ол туһунан Усуйаана территориятааҕы быыбардыыр хамыыһыйатын бэрэссэдээтэлэ Шагелды Исмайылова кэпсиир: «Улуус ыраах сытар сирдэригэр болдьоҕун иннинэ куоластааһын балаҕан ыйын 2 күнүттэн саҕаламмыта. 616 №-дээх учаастактааҕы быыбар хамыыһыйатын чилиэннэрэ (хамыыһыйа бэрэссэдээтэлэ Эльвира Афанасьевна Распутина) Тарыҥ Үрэх диэн ыраах учаастакка, бөртөлүөтүнэн көтөн тиийэн, геологтарга куоластааһыны ыыттылар. Бэйэлэрин Конституциянан мэктиэлэммит бырааптарын 31 киһи толордо.
Табаһыттарга, нефтебаза үлэһиттэригэр уонна балыксыттарга эрдэттэн куоластааһыны Казачье сэлиэнньэтин УИК 622 № -дээх учаастактааҕы быыбардыыр хамыыһыйа чилиэннэрэ ыытан бүтэрбиттэр (хамыыһыйа бэрэссэдээтэлэ Мария Иннокентьевна Григорьева). Кинилэр быыбардааччыларыгар тиийээри хоту өрүстэр тымныы долгуннарынан мотуордаах оҥочонон сүүһүнэн килэмиэтири айаннаабыттар.
Сайылык сэлиэнньэтин 615 №-дээх учаастактааҕы быыбардыыр уокуругун чилиэннэрэ (бэрэссэдээтэл Жанна Николаевна Степанова) Тирэхтээх уонна Оловяннай учаастактарыгар хорҕолдьун хостуур үлэһиттэргэ куоластааһыны ыыппыттар, барыта 245 киһи куоластаабыт.
617 №-дээх учаастактааҕы быыбардыыр хамыыһыйа чилиэннэрэ (хамыыһыйа бэрэссэдээтэлэ Анастасия Александровна Дышлевая) «Полиметалл» ХЭУо вахтовай бөһүөлэгин үлэһиттэригэр куоластааһыны ыыппыттар. Манна 54 үлэһит куоластаабыт.
Хайыр сэлиэнньэтин 620 №-дээх учаастактааҕы быыбардыыр хамыыһыйа чилиэннэрэ (бэрэссэдээтэл Мария Николаевна Томская) үс күн субуруччу ыраах сытар сирдэргэ болдьоҕун иннинэ куоластааһыны ыыппыттар, манна «Кристалл» АДК, нефтебаза үлэһиттэрэ, көмүс хостооччулар Причал, Севернай, Кулар диэн сирдэр бааллар. Быыбардааччыларга вездеходунан тиийэллэр.
Бу күннэргэ Усуйаана сэлиэнньэтин 624 №-дээх учаастактааҕы быыбардыыр хамыыһыйа чилиэннэрэ (бэрэссэдээтэл Ольга Васильевна Горохова) вездеходунан табаһыттарга уонна балыксыттарга ыраах учаастактарга айанныахтара.
Куоластааһын иннинэ учаастактааҕы быыбардыыр хамыыһыйа чилиэннэрэ хандьыдааттар уонна бэлитиичэскэй баартыйалар тустарынан иһитиннэрэр матырыйааллаах муннугу тэрийэллэр, онон быыбардааччылар талыахтарын иннинэ билсиһэр кыахтаналлар.
Бүгүҥҥү күҥҥэ Усуйаана ыраах сытар сирдэригэр 350 киһи куоластаата.
