Страховой биэнсийэҕэ бигэргэтиллибит эбии төлөбүр 70 сааһыттан икки төгүл үрдүөхтээх, онтон хас 10 сылынан элбиэхтээх. Бу туһунан ТАСС Ил Түмэн үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэт баһылыга Ярослав Нилов эттэ.
Билигин биэнсийэҕэ бигэргэтиллибит төлөбүр икки төгүл улаатыыта биэнсийэлээх 80 сааһын туоллаҕына буолар. Онуоха Нилов бэлиэтээбитинэн, “эмп-том, медицинскэй көмө, көрүү-истии эбии ороскуота үгүстэргэ лаппа эрдэ үөскүүр”.
«Биһиги коллегаларбын кытта гражданнар көрдөһүүлэринэн хайыы үйэ прогрессивнай механизмы туруорсубуппут: 70 сааска бигэргэтиллибит төлөбүрү 100%, 80 сааска 200%, 90 сааска 300% үрдэтии. Киһи сааһыран истэҕин аайы доруобуйатынан уонна күннээҕи көрүүтүнэн сибээстээх объективнай ороскуота соччонон элбэх, ону биэнсийэ систиэмэтэ учуоттуохтаах», — диэтэ депутат.
Сааһынан страховой биэнсийэ — Арассыыйаҕа саамай тарҕаммыт биэнсийэ көрүҥэ — страховой чаастан уонна бигэргэтиллибит төлөбүртэн турар. Страховой чаас кээмэйэ мунньуллубут биэнсийэ бааллартан тутулуктаах, бигэргэтиллибит төлөбүрү судаарыстыба быһаарар. 2026 сыллаахха ол 9 тыһ.584 солк. тэҥнэһэр, оттон биэнсийэлээх 80 сааһыттан икки төгүл улаатар — 19 тыһ. 169 солк. тиийэр. Хаттаан ааҕыы тута буолар, эбии төлөбүр биэнсийэ ылааччыга төрөөбүт күнүн кэнниттэн кэлэр ыйга киирэр.
