Билигин өрөспүүбүлүкэҕэ 42 229,1 туонна үүт соҕотуопкаламмыт, бу 2026 сыллааҕы былаан 77,4%-гар тэҥнэһэр диэн эрэгийиэн тыатын хаһаайыстыбатын министиэристибэтэ иһитиннэрэр.
Үүтү улахан кээмэйинэн Мэҥэ Хаҥалас улууһугар — 4719 туонна, Сунтаарга — 4512 туонна, Чурапчыга — 3674 туонна, Хаҥаласка — 3369 туонна, Аммаҕа — 3168 туонна, Бүлүүгэ — 3123 туонна уонна Ньурбаҕа — 2788 туонна туттарбыттар. Дьокуускай куоракка 2503 туонна соҕотуопкаламмыт.
Үүтү тутууну 56 соҕотуопка тэрилтэтэ ыытар. 2026 сылга үүтү оҥорууга уонна соҕотуопкалааһыҥҥа өйөбүлгэ 3,7 млрд солкуобай көрүллүбүт, судаарыстыбаннай бырагыраама чэрчитинэн бигэргэтиллибит субвенция кээмэйэ 4,6 млрд солкуобайга тэҥнэһэр, оттон былааннаах соҕотуопка кээмэйэ — 65,7 тыһыынча туонна.
Муниципальнай уонна куорат уокуруктарыгар бүддьүөт ассигнованиелара 2,861 млрд солкуобай кээмэйинэн тиэрдиллибит, бу сыллааҕы үбүлээһин кээмэйин 78,8%-на буолар.
