Анал байыаннай дьайыы саҕаланыаҕыттан 4980 байыаннай сулууспалаах Саха сиригэр медицина көмөтүн ылла, олортон стационардарга – 1336. Бу туһунан балаҕан ыйын 14 күнүгэр ыытыллыбыт брифиҥҥэ эрэгийиэн доруобуйа харыстабылын министиэристибэтин кылаабынай терапевт-бырааһа Айталина Торонова иһитиннэрдэ.
«Өрөспүүбүлүкэҕэ 2024 сылтан анал байыаннай дьайыы бэтэрээннэрин кэҥэтиллибит диспансеризациялааһын ыытыллар. Сыл аайы икки тыһыынча кэриҥэ киһи бу тэрээһини ааһан. Бүгүҥҥү күҥҥэ 1427 бэтэрээн диспансеризацияны ааста. Дьокуускай сиригэр олорор сиринэн поликлиникаларга, ону тэҥэ Бестужев-Марлинскай уулусса 1-кы нүөмэрдээх дьиэтигэр баар аадырыска өрөспүүбүлүкэтээҕи уопсастыбаннай доруобуйа уонна медицинскэй профилактика киинин базатыгар эрдэттэн суруйтарыыта суох эмиэ ааһыахха сөп. Бу тэрилтэ базатыгар медицинскэй реабилитацияны 463 бойобуой дьайыы бэтэрээнэ ааста», — диэн Айталина Торонова бэлиэтээтэ.
Кини иһитиннэрбитинэн, медико-психологическай, психотерапевтическай уонна психиатрическай медицинскэй көмө анал байыаннай дьайыы 964 кыттыылааҕар уонна кинилэр дьиэ кэргэттэрин 1392 чилиэнигэр оҥоһуллубут. «КСВО. Психологы кытта кэпсэтиини» биир кэлим федеральнай ханаалынан уйулҕа көмөтүн дойду араас регионнарыттан икки тыһыынчаттан тахса абонент ылла.
