Аллараа Бэстээххэ «Синергия Арктики» бырайыагы олоххо киллэрэргэ 144 км волокно-оптическай хаабыл аҕалылынна. Ол туһунан Саха сирин инновацияларын, цифровой сайдыытын уонна инфокоммуникационнай технологияларын миниистирэ Петр Николаев иһитиннэрдэ, суруйда ЯСИА.
Хаабылы Самара оптическай хаабыл хампаанньата (СОКК) оҥордо. Бастакы сакаас чэрчитинэн тэрилтэттэн барыта 600 км кэриҥэ хаабылы аҕалыы көрүллэр. Аҕалыы үлэтэ алтынньы бүтүөр диэри былааннанар. Инникитин эбии кээмэйи атыылаһыы былааннанар. Хаабыл 2026 сылга да, бырайыагы олоххо киллэрии кэлин түһүмэхтэригэр да сибээс линияларын тардыыга туһаныллыаҕа.
Бүгүҥҥү күҥҥэ «Синергия Арктики» бырайыагы олоххо киллэрэргэ оҥорон таһаарааччылартан барыта 876 км хаабыл кэллэ, ол иһигэр Аллараа Бэстээххэ аҕалыллыбыт 144 км СОКК бородууксуйата. Бу кээмэй улахан аҥара хайыы-үйэ 2026 сыллааҕы трассаларынан сибээс линияларын тардыыга бэдэрээттэһэр тэрилтэлэргэ бэрилиннэ.
