Саха сирин 3Д-ох сүүмэрдэммит хамаандата Алтаай Өрөспүүбүлүкэтин Озерное сэлиэнньэтигэр ыытыллыбыт «Стрелы Алтая-2026» норуоттар икки ардыларынааҕы күрэхтэһиилэргэ ситиһиилээхтик кытынна. Күрэхтэһии түмүгүнэн сахалар араас дисциплиналарга биир кыһыл көмүс, биир үрүҥ көмүс уонна түөрт боруонса наҕараадалары ыллылар, диэн эрэгийиэн ох саанан ытыыга Федерацията иһитиннэрэр.
«Шагаяк» ытыыга турнир кыайыылааҕынан Марияна Кусатова буолла, оттон Максим Васильев ити категорияҕа үрүҥ көмүһү ылла.
Историческай ох саанан 3Д-ытыыга күрэхтэһиигэ эр дьон ортотугар боруонса призерынан Архип Скрябин буолла. Классическай оххо 3Д кылааһыгар эмиэ итинник түмүгү Альберт Мигалкин көрдөрдө, кини турнир түмүгүнэн эмиэ РФ спордун маастарыгар кандидат нуорматын толордо.
Өссө биир боруонсаны классическай ох саанан 3Д ытыыга Александр Дьяконов уонна Александра Черкашина састааптаах булкаас хамаанда аҕалла. Николай Петров «Фокус»дисциплинаҕа үс призеры түмүктээтэ.
Турнирга Россияттан, Кытайтан, Монголияттан, Ирантан, Кыргыстаантан, Беларусьтан уонна Узбекистантан спортсменнар кытыннылар.
