22 От ыйа 22.07
  • 15°
  • $ 88,02
  • 96,04

Ньурбаҕа икки булчут дьиикэй табаны, улары көҥүлэ суох бултаан тутулунна

17:23, 15 ноября 2016
Текст:
Читайте нас на
Яндекс Новости
ЯДВ

Соторутааҕыта СӨ Айылҕа харыстабылын министиэристибэтин анал бөлөҕө Ньурба улууһугар рейдэ оҥоро сылдьан, Яковлев уонна Иванов диэн булчуттар көҥүлэ суох дьиикэй табаны уонна улары бултуу сылдьалларын туттулар.


Ньурба улууһун Дьаппара диэн сиригэр гражданин Иванов «УАЗ» массыынатын бэрэбиэркэлииллэригэр анал бөлөх СКС карабин, Вепрь, кыра калибрдаах икки бинтиэпкэни туттулар уонна тимир көлө иһигэр астаныллыбыт 1 тайах, 5 дьиикэй таба этин уонна 9 улары буллулар. Яковлев биир тайаҕы уонна биир табаны бултуурга эрэ анал көҥүллээх эбит. Иванов итинник докумуона суох буолан биэрбит. Онон 4 дьиикэй табаны, 9 улары анал көҥүлэ суох бултаабыт буолан тахсаллар. Сокуону кэспиттэрин иһин, булчуттар сааларын уонна бултарын тутан ылбыттар.

Көҥүлэ суох сылдьыбыт булчуттар уопсай хоромньулара 375 тыһ. солк. тэҥнэһэр. Бу чахчынан Ньурба полицията РФ Холуобунай-процессуальнай кодексатын 144-155-с ыстатыйаларынан бэрэбиэркэ ыытар. Ол түмүгэр, холуобунай дьыала тэриллиэн сөп.

Санатар буоллахха, сэтинньи саҥатыттан Ньурба, Миирнэй уонна Өлөөн улуустарынан Өлүөнэ-Өлөөннөөҕү дьиикэй таба популяцията айаннаан ааһан иһэр. Мантан сиэттэрэн, бу улуустарга СӨ Айылҕа харыстабылын министиэристибэтин анал бөлөхтөрө рейдэ оҥороллор. Дьиикэй табаны анал көҥүллээх эрэ буоллахха бултаныллыахтааҕын туһунан тустаах министиэристибэ сэрэтэр.

Следите за самым важным и интересным в Telegram-канале и WhatsApp-группе ЯСИА