Социальнай ситимҥэ хотугу үөр табалар көһөн эрэр видеоларын тарҕаппыттара (дьон суруйарынан, быһа холоон, Ньурбаҕа буолбут түбэлтэ). Маныаха, биологическай баай-дуол уонна ордук харыстанар сир-уот дирекциялара эппиэттээтэ.
«Тарҕаммыт видеоҕа Ньурба буолбатах, тоҕо диэтэргин видео уһуллубут кэмигэр Ньурбаҕа хаар суох этэ. Биһиги билэрбитинэн бу видеоны былырыын Эдьигээн улууһугар «Молодо» диэн сиргэ уһулбуттар”, — диэн ЯСИА-ҕа экология Министиэристибэтин пресс-сулууспата биллэрдэ.
Саха сирин учуонайдара хотугу үөр табалар көһүүлэрин кэтээн көрөллөр. Хас биирдии табаҕа анал спутниковай моойторуктаах. Сыллата табалар бэйэлэрэ билэллэринэн көһө сылдьан аһыыллар, сирдэрин-уоттарын кэҥэтэллэр. Спутник көрдөрөрүнэн, табалар Лено-Оленекскай популяциялара, билигин Өлөөн, Мииринэй уонна Ньурба, Эдьигээн хотугу өттүгэр сылдьаллар. Табалар бу улуустар сирдэрин уларыта сылдьан көһөллөр.
Дьыл бу кэмигэр хотугу табалар улахан үөрүнэн мустан көһөр идэлээхтэр. Бу кинилэр көрүҥнэрин уратыта диэн бэлиэтиэххэ сөп.
